وەزیری دەرەوەی عێراق: نە تورکیا و نە پەکەکە مافی ئەوەیان نییە خاکی ئێمە بەکاربێنن

SNN

وەزیری دەرەوەی عێراق دەڵێت: “پێشبینی مامەڵەیەکی جیاواز دەکەین لەلایەن ئیدارەی نوێی ئەمریکاوە” ئاماژە بەوەشدەکات کە نە تورکیا و نە پەکەکە مافی ئەوەیان نییە خاکی عێراق بەکاربێنن بۆ یەکلاکردنەوەی ململانێکانی نێوانیان.

لەمیانەی سەردانیدا بۆ مۆسکۆ لە چاوپێکەوتنێکیدا لەگەڵ کەناڵی ئاڕ تی رووسی فوئاد حسێن رایگەیاند “جۆو بایدن و بلینکن-ی وەزیری دەرەوەی ئەمریکا کاری لەپێشینەیان دۆسیەی عێراق دەبێت”.

وەزیری دەرەوەی عێراق دەشڵێت: “نامانەوێت عێراق ببێتە گۆڕەپانێک بۆ ساغکردنەوەی ناکۆکییەکانی نێوان ئێران و ویلایەتە یەکگرتووەکانی ئەمریکا”.

فوئاد حسێن وەزیری دەرەوەی عێراق لە چاوپێکەوتنەکەدا وتیشی: “پێشبینی ناکەم هیچ گۆڕانێک بەسەر ململانێکانی ئێران و ئەمریکادا بێت”.

جەختیشیکردەوە کە بەغدا بە هەموو شێوەیەک رەتیدەکاتەوە پەکەکە لە ناو خاکی عێراقدا چالاکی هەبێت وتیشی:”لە هەمانکاتدا تورکیا مافی ئەوەی نییە سنووری وڵات بە ئارەزووی خۆی ببەزێنێت”.