وەزیری کار: تائێستا نازانین رێژەی بێکاری لە هەرێم چەندە

SNN- بڕیار محەمەد

وەزیری کارو کاروباری کۆمەڵایەتی ڕایدەگەیەنێت “بێکاریی و هەژاری و قەیرانی دارایی و ئابووری هۆکاری کۆچی گەنجانن و داوامان کردووە لەئەنجوومەنی وەزیران پێدانی قەرزی بچووک دەستپێبکاتەوە”.

کوێستان محەمەد، وەزیری کارو کاروباری کۆمەڵایەتی لە کۆنفرانسێکی ڕۆژنامەوانیدا ڕایگەیاند “ئێمە ڕاپۆرتی خۆمان ئامادەیە لەبارەی هۆکارەکانی کۆچی گەنجان و ئەو کارانەی کردومانە لەماوەی دەستبەکاربوونمان لەچوارچێوەی ڕاپۆرتەکەمان دەیخەینەڕوو”.

دەشڵێت: “ناتوانم بڵێم ڕێژەی بێکاری چەندە تا ئەوکاتەی سەرژمێرییەکی دروست نەکرێت، ناتوانین ڕێژەکە بخەینەڕوو، ئامارێک خراوەتەڕوو، بەڵام پشتی پێ نابەسەتین تاوەکو سەرژمێری نەکرێت”.

سەبارەت بەهۆکاری کۆچکردنیش وەزیری کار باسی لەوەکرد، هۆکارەکان بێکاری و هەژاری و قەیرانی دارایی و ئابوورییە و ئەوەشی لەدەستمدایە ڕاپۆرتی تایبەتە بە هۆکارەکانی کۆچی گەنجان و ئەو کارانەی کردومانە.

راشیگەیاند “چەندین پڕۆژە هەیە بۆ دروستکردنی هەلی کار، ئەوەی پەیوەندی بەئێمەوە هەیە یاسای کار و یاسای خانەنشین و دەستەبەری کۆمەڵایەتی و پڕۆژەی قەرزی بچوکە کە داوامان کردووە لەئەنجوومەنی وەزیران پێدانی ئەو قەرزە دەستپێبکەینەوە”.