لەدوای کوژرانی فەخریزادە؛ نەسروڵا خۆی حەشارداوە
SNN
بەگوێرەی زانیارییە هەواڵگرییەکانی ئیسرائیل، لەدوای کوژرانی موحسین فەخریزادە زانای ئەتۆمی لە نزیک تاران، لەئێستادا حەسەن نەسروڵا سکرتێری گشتی حزبوڵا خۆی حەشارداوە.
کەناڵ 13 ی ئیسرائیلی بە سوودوەرگرتن لە زانیارییە هەواڵگرییەکان ئەوەی ئاشکراکردووە: حەسەن نەسروڵا لە ئێستادا تەواوی جموجوڵەکانی راگرتووە، ئەوەش لەسەر راوێژی تیمی ئەمنی خۆی بووە.
ئەو میدیا ئیسرائیلییە ئەوەی نوسیوە: “کردنەئامانجی نەسروڵا لەلایەن ئیسرائیلەوە ئەگەرچی بەکارێکی دژوار دانانرێت بەڵام مەترسی هەیە ببێتە هۆی دروستبوونی پشێوییەکی زۆر لە ناوچەکەدا”.
کوژرانی فەخریزادە کاردانەوەی زۆری لەناوخۆی ئێران و جیهان دروستکردووە، لە دوایین لێدوانیدا عەلی شەمخانی، سكرتێری ئەنجوومەنی باڵای ئاسایشی نەتەوەیی ئێران رایگەیاند: “فەخریزادە بە چەکێکی ئەلیکترۆنی و لەدوورەوە کۆنتڕۆڵکراو کوژراوە”، ئەوەش گومانی ئەوەی کە یسرائیل لە پشت کوژرانی ئەو زانایەوەبێت هێندەی دیکە زیاددەکات.
