رێژەی سەوزایی هەرێم لەخوار ستانداردەوەیە؛ لە هەولێریش کەمترینە

SNN- بریار محەمەد

وتەبێژی دەستەی ژینگەی هەرێمی كوردستان رایدەگەێنێت بەگوێرەی ستانداری جیهانی، رێژەی سەوزایی لە شارەكان دەبێت لەنێوان 15% بۆ بۆ 30% كەمتر نەبێت، بەڵام لە هیچ شار و شارۆچكەیەكی هەرێمی كوردستان سەوزایی رێژەی 13%ی تێنەپەڕاندووە، دەشڵێت: هەولێر بەراورد بە پارێزگاکانی دیکەی هەرێمی کوردستان کەمترین رێژەی سەوزایی هەیە.

ئەحمەد محەمەد، وتەبێژی دەستەی پاراستن و چاككردنی ژینگەی هەرێمی كوردستان بە  SNNی راگەیاند: رێژەکەی  بەپێی دوایین رووپێوی کە کراوە و ساڵی 2015 لەلایەن وەزارەتی كشتوكاڵ و سەرچاوەكانی ئاوی هەرێم هاتووە بۆمان دەركەوتووە رێژەی سەوزایی لە هەرێمی كوردستان لە 12 و پۆینت 4  ئەمەش لەگەڵ ستاندارە جیهانییەكان کەمە، چونكە بەپێی ستاندارە جیهانییەكان دەبێت رێژەی سەوزایی لە شارەكان لەنێوان 15% بۆ بۆ 30% كەمتر نەبێت.

لە 2015ەوە هیچ رووپێوییەک بۆ دیاریکردنی رێژەی سەوزایی هەرێم نەکراوە

وتیشی : بەرزترین رێژەی سەوزایی لەسەر ئاستی پارێزگاكان بەم شێوەیە یە لە پارێزگای دهۆك: ( 27.58%)و لە پارێزگای هەڵەبجە (10.04%) هەروەها لە پارێزگای سلێمانی (9.1%) لە پارێزگای هەولێر: (9.05 % ) و گەرمیان: (4.4%).

بێ ئاوی و نەبوونی بودجە هۆکاری وشکبوونی پارکەکانبوون

ئاسۆ شكاك، سەرۆكی رێكخراوی ئاڤیاری هۆشیاریی ژینگە بە  SNNی راگەیاند: بەهۆی بێ ئاوی و بێ بودجەیی چەندین پارك وشكبوون و چەندین ناوچەی سەوزاییش كراونەتە باڵەخانە، بە تایبەت لە شوێنەكانی نیشتەجێبوون، هەروەها لە گەڕەكەكانیش زۆر كەم دار دەچێندرێت: “یەك دار ئۆكسجینی سێ مرۆڤ دابین دەكات، ئەگەر گەڕەكێك هەزار كەسی تێدا بژیت پێویستی بە 300 دارە، ئێستا بۆ ئەو مەبەستە خەریكی لێكۆڵینەوەیەكین لە شاری هەولێر و دەمانەوێت داتای ورد كۆبكەینەوە، ئەمانە هەموو هۆكارن بۆ كەمی رێژەی سەوزایی .