داعش خۆی بە بەرپرسیاری هێرشی سەر پاسە سەربازییەکەی سوریا ناساند

SNN

ئەو هێرشەی شەوی چوارشەممەی رابردوو کرایە سەر پاسێکی نەفەرهەڵگر لە سوریا، رێکخراوی داعش بەرپرسیارێتیی ئەنجامدانی گرتە ئەستۆی خۆی.

هەواڵەکە پێگەی سایت بڵاویکردووەتەوە کە تایبەتمەندە لە چالاکی گرووپە تیرۆریستییەکان کە ئەویش پشتی بە بەیاننامەیەکی رێکخراوی داعش بەستووە.

بەیاننامەکەی داعش دەڵێت: “لەڕێگەی بۆمبی سەر رێگەوە توانیمان پاسێکی پڕ لە سەربازی سوپای سوریا بکەینە ئامانج و 40 سەربازی رژێمی ئەسەد بکوژین”.

شەوی چوارشەممەی رابردوو میدیای رەسمی سوریا بڵاویکردەوە “لە بۆسەیەکی چکدارانی نەیاری دیمەشقدا 20 سەرباز و 8 هاووڵاتی سڤیل گیانیانلەدەستداوە پاشئەوەی هێرشکراوەتە سەر پاسەکەیان”.

بەوتەی میدیای رەسمی سوریا، تیرۆریستان بە هێرشەکە هەستاون کاتێک پاسەکە لەسەر رێگەی نێودەوڵەتی هەردوو شاری تەدمور و دێرەزور بووە.

بەپێی ئاماری رەسمی، هێرشەکە بووەتەهۆی کوژرانی 40 سەربازی سوپای سوریا و 8 هاووڵاتی مەدەنیش گیانیانلەدەستداوە و 9ی دیکەش بریندار بوون و چەکدارانی سەربە داعش ئەنجامدەری هێرشەکەن.

سەرچاوە ناوخۆییەکانی سوریا وتیان “سەربازە کوژراوەکان سەربە سوپای سوریان و هێرشەکەش لەلایەن چەکدارانی داعشەوە ئەنجامدراوە”.

ئەو شوێنەی بە دیاریکراویی هێرشەکەی لێ ئەنجامدراوە، ناوی (کەباجب)ە و ماوەیەکی زۆرە فڕۆکە جەنگییەکانی رووسیا بە گوومانی هەبوونی داعش، رۆژانە بۆردوومانی دەکەن.