پێکوتەی کۆرۆنا دەگاتە عێراق

SNN

وەزارەتی تەندروستیی و ژینگەی عێراق رایدەگەیەنێت “لە چارەگی یەکەمی ئەمساڵدا ڤاکسینە نوێیەکەی دژە کۆرۆنا دەگاتە عێراق، واتا نزیکەی 2 مانگی دیکە”.

سەیف ئەلبەدر وتەبێژی وەزارەتەکە ئەمڕۆ دووشەممە وتی: “حکومەتی عێراق گرێبەستی واژوو کردووە لەگەڵ کۆمپانیای فایزەر و لە داهاتوودا دەستدەکەین بە دابەشکردنی”.

ئاشکرایکرد “لەگەڵ 180 دەوڵەتی دیکە لەناو هاوپەیمانیی نێودوەڵەتیی بۆ ڤاکسین ئەندامین و پشکی عێراق لە پێکوتەی کۆرۆنا 20 لەسەدە، واتا 8 ملیۆن دانە لە ڤاکسینەکە بەر عێراق دەکەوێت”.

وتیشی: “لە بەندی یەکەمی رێککەوتنەکەدا وەک قۆناغی سەرەتا 1.5 ملیۆن دانە لە پێکوتەکە دەگاتە عێراق لە دوو مانگی دهاتووشدا ئەویتریش دەگاتە دەستمان”.

راشیگەیاند “دابەشکردنی پێکوتەکە هەموو پارێزگاکانی عێراق دەگرێتەوە و بە زۆرەملێش نییە لێدانی لە هاووڵاتی، لەڕێگەی میدیاوە ناوی ئەو نەخۆشخانانە دەستنیشاندەکەین کە کووتانەکەی تێدا دەکرێت”.

هەر دوێنێش وەزارەتی تەندروستی عێراق رایگەیاند: نزیكەی 60 بنكەی دابەشكردنی ڤاكسینی فایزەر دیارکراوە و ئەو دابەشکردنە بنکە تەندروستییەکان ناگرێتەوە.”

ریاز عەبدولئەمیر بەڕێوەبەری تەندروستی گشتی لە وەزارەتی تەندروستی عێراق لە لێدوانێكی رۆژنامەوانیدا رایگەیاند: وەزارەتی تەندروستی پلانێکی داناوە بۆ دیاریکردنی بنکەکانی دابەشکردنی ڤاکسینی دژە کۆرۆنای فایزەر لەکاتی گەیشتنی بۆ عێراق، تەنها نەخۆشخانەکان دەتوانن ڤاکسینەکە دابەشبکەن و لەنەخۆشخانەکاندا دەدرێت بەخەڵکی، نەک لە بنکە تەندروستییەکانی گەڕەکەکان، لە ئێستادا 60 بنکە لە عێراق دیاریکراوە.

ریاز ئاماژەی بەوەشکرد، دۆخی کۆرۆنا ئێستا لە عێراقدا زۆر باشە و بەرەو باشتریش دەڕۆین، ژمارەکانی تووشبوون و گیانلەدەستدان بەشێوەیەکی بەرچاو دابەزیوە ژمارەی چاکبوونەوەش لە ڤایرۆسەکە بەردەوام لە هەڵکشاندایە.

مانگی دوانزەی ساڵی پار ریاز خەلفی بەڕێوەبەری گشتیی وەزارەتی تەندروستیی عێراق وتی: “لە قۆناغی کۆتایی گفتوگۆدان لەگەڵ کۆمپانیای فایزەر بەمەبەستی کڕینی پێکوتەکە و چاوەڕێدەکرێت چارەگی دووەمی ساڵی داهاتوو بگاتە دەستیان”.

خەلفی وتیشی: “حکومەتی عێراق لەگەڵ ئەو کۆمپانیایانە گرێبەستی کڕینی ڤاکسین دەکات کە لەلایەن رێکخراوی تەندروستیی جیهانی و ئاژانسی دەرمانی بەریتانیا و ئەمریکاوە پەسەند کرابێت”.

ریاز خەلفی بەڕێوەبەری گشتیی وەزارەتی تەندروستیی عێراق ئەوەشی ئاشکرا کردووە “ڤاکسینەکە لەگەڵ گەیشتنی بە عێراق یەکەمجار لە ستافی تەندروستی و دواتر بەتەمەنەکان و پاشان ئەوانەی نەخۆشی درێژخایەنیان هەیە دەدرێت، ئینجا هێزە ئەمنیییەکان”.