کودەتای سەربازی لە میانمار ئەنجامدرا

SNN

هێزێکی سەربازی کودەتای بەسەر حکومەتی میانماردا کرد و باری نائاسایی لە وڵاتەکە بۆ ماوەی یەک ساڵ راگەیەندرا، ئەوەش دوای ئەوەی ئۆنگ سان سو چی راوێژکاری “ناشەرعی” میانمار و گەورە بەرپرسانی وڵاتەکە سەرلەبەیانی ئەمڕۆ دەستگیرکران.

لە سەرلەبەیانی ئەمڕۆ دووشەممەوە هێڵەکانی پەیوەندیکردن لە میانمار پچڕێندرا و هێزی سەربازی چوونە ناو دام و دەزگاکانی وڵاتەکە، جگە لە کەناڵی میاوادی کە لەلایەن سوپاوە بەڕێوەدەبرێت، سەرجەم کەناڵە تەلەفزیۆنەکانی میانمار لەکارخران.
کودەتاکە لەدوای ئەو ناکۆکیانە دروستبوو کە لە ماوەی رابردوودا لەلایەن حکومەت و دەسەڵاتی سەربازی وڵاتەکە هەبوون سەبارەت بە ئەنجامی هەڵبژاردنەکان.

کودەتاچییەکانیش بە سەرکردایەتی مین ئۆنگ هلەینگ فەرماندەی هێزە چەکدارەکانی میانمار لە پەیامێکیدا دووپاتیکردەوە: بەهۆی ساختەکاری لە هەڵبژاردنی گشتی وڵاتدا کودەتایانکردووە.

لە ئێستادا هێزی سەربازی لە شاری نای پی تاو-ی پایتەخت و یانگۆن کە بە گەورەترین شاری وڵاتەکە دادەنرێت بڵاوکراوەتەوە.