کۆمسیۆن، 70 هەزار ئامێری وردبینی لە پەنجەمۆری دەنگدەران، بۆ هەڵبژاردنەکان ئامادەکردووە

SNN

ئەمڕۆ دووشەممە، کۆمسیۆنى باڵاى هەڵبژاردنەکانى عێراق ڕایگەیاند: زیاتر لە 70 هەزار ئامێرى پشکنین بۆ هەڵبژاردنى داهاتوو تەرخانکراوە و سەرجەم کێشەى پڕۆگرام و وردبینى لە پەنجەمۆرى دەنگدەران بەو ئامێرانە بە 100%ى دەستەبەر کراوە.

جەمانە گلاى، وتەبێژى کۆمسیۆنى باڵاى هەڵبژاردنەکان لە کۆنگرەیەکی رۆژامەوانیدا راگەیاند: ژمارەى ئامێرەکانى پشکنین دەگاتە نزیکەى 70 هەزار و 704 ئامێر و ئەوانەشى بۆ جیاکردنەوەى دەنگەکان تەرخانکراون دەگاتە نزیکەى 63 هەزار ئامێر، کۆمسیۆن ئامێرە پشکنینە نوێییەکە بەکاردەهێنیت و هەروەها کار بە ئامێرى جیاکردنەوە و ژماردنى ئەلیکترۆنیش دەکات.

جەمانە ئاماژەی بەوەشکرد، ئەو ئامێرانە تایبەتەتمەندێتى باشیان هەیە لەڕووى بارگاویکردنەوە لەکاتى پچڕانى کارەبا لە ناوەندەکانى دەنگدان و هەروەها وردبینیکردن لە پەنجەمۆرەکاندا بەڕێژەى 100% گەرەنتی هەیە.

بەرپرسەکەى کۆمسیۆن باسى لەوەش کردووە، پڕۆگرامى ئەو ئامێرانە بەشێوەیەک دیزاینکراوە لەگەڵ کەشوهەواى عێراقدا شیاوە و هەروەها نوێکردنەوەى بەرنامەکانیشى لەگەڵ یاسایى نوێى هەڵبژاردنەکانیشدا یەکدێتەوە و سەربارى هەموو جۆرە کێشەیەک لە پڕۆگرامە نوێییەکان بۆ دەنگدان بەشێوەیەکى پاک و بێ کێشە چارەسەر کراوە.

بڕیارە لە 10ی تشرینی یەکەمی ئەمساڵدا، هەڵبژاردنی پێشوەختە لە عێراق ئەنجام بدرێت و حکومەت و کۆمسیۆنیش هەموو ئامادەکارییەکیان کردوە.