تورکیا هەڵمەتێکی دەستگیرکردنی فراوانی لە 40 پارێزگا دەستپێکرد

SNN

ئەمڕۆ دووشەممە، تورکیا هەڵمەتێکی فراوانی لە زۆربەی پارێزگاکانی خۆی دەستپێکردووە 780 کەسی لە پلە و پۆستی جیاوازدا دەستگیرکردووە، بە تایبەتی ئەوانەی کە ئەندامی پارتی گەلانی دیموکرات HDP، بە تۆمەتی هەبوونی پەیوەندی بە پارتی کڕێکارانی کوردستان PKKوە.

وەک تورکیا خۆی ناوی دەبات ئەم “هەڵمەتە بۆ تۆڵەسەندنەوە لەو 13 سەربازەی کە لە چیایی گارە لەلایەن پەکەکەوە کوژراون”، بەڵام خودی پەکەکە هەر زوو روونیکردەوە کە ئەو 13 سەبازە تورکەی کە بە بارمتە گیرابوون لەلایەن خودی تورکیاوە کوژراون.

وەزارەتی ناوخۆی تورکیا لە راگەیەندراوێکدا ئاماژە بەوە دەکات، لەکاتی هەڵکوتانە سەر ئەو شوێنانەی کە گومانلێکراوەکانمان دەستگیرکردوون، دەستمان بەسەر چەند بەڵگەو دۆکۆمێنتێکدا گرتووە، کە دەریدەخات ئەو کەسانە پەیوەندیان بە پەکەکەوە هەیە، هەڵمەتەکە لە 40 پارێزگاو شاری جیاوازی تورکیا دەستیپێکردووە و بەردەوامی دەبێت.