هەڵبژاردن دواناخرێت و داوا لە هاووڵاتیان دەکرێت بەزووترین کات کارتی بایۆمەتری نوێبکەنەوە

SNN

حسێن هینداوی راوێژکاری مستەفا کازمی بۆ هەڵبژاردنەکان رایگەیاند: دوا لە هاووڵاتیان دەکەم پەلە بکەن لە نوێکردنەوەی کارتی بایۆمەتری چونکە بەبێ کارتەکە بە هیچ جۆرێک دەنگ نادرێت و هەڵبژاردنەکانی مانگی 10ی ئەمساڵ دەکرێت و شتێک نییە بەناوی دواخستن.

هینداوی بە میدیا عێراقییەکانی راگەیاند: هەڵبژاردنی 10ی تشرینی یەکەمی ئەمساڵ بە هیچ جۆرێک و لە ژێر هیچ بیانوییەکدا دواناخرێت، ئەو کەسانەشی دەڵێن دوادەخرێت کۆمەڵێک خۆزگە و پێشبینی خۆیانە کە سەرجەمیان دوورە لە راستییەوە، کۆمسیۆنی باڵای سەربەخۆی هەڵبژاردنەکانی عێراق دەستی کردووە بە تەواوەی رێکارە پێویستەکان و تۆمارکردنی ناوی کاندید و حزبەکان و هاوپەیمانێتییەکان لە عێراقدا.

هینداوی داواش لە کۆمسیۆنی باڵای سەربەخۆی هەڵبژاردنەکانی عێراق دەکات کە کارمەندانی کۆمسیۆن زیادبکەن تا بتوانرێت کارەکان زۆر خێراتر لەوەی کە هەیە رابپەڕێنرێت، لەگەڵ ئەوەشدا روونکردنەوەی زیاتر بدەن بە دەزگاکانی راگەیاند تا لە رێگەیانەوە هاووڵاتیان بتوانن کارتی بایۆمەتری نوێبکەنەوە، چونکە بەبێ بوونی کارتی بایۆمەتری نوێ هاووڵاتیان ناتوانن دەنگ بدەن.