“دەبێت ئەمريکا لە مەسەلەی پەکەکەدا ئاسايشی تورکيا رەچاوبکات”
SNN
وتەبێژی سەرۆککۆماری تورکيا رايگەياند:” پەيوەندييەکانمان لەگەڵ واشنتۆن دەکرێت بنيادنەربن، ئێمە دەتوانين سوود لە يەکتر وەرگرين و کێشە جيهانييەکان تاوتوێ بکەين”.
ئيبراهيم کاڵن وتەبێژی سەرۆککۆماری تورکيا لە لێدوانێکيدا بۆ ئاژانسی بلومبێرگ، باسی لەوەکردووە: “ئەم پەيوەندييە دوولايەنانە لەسەر بنەمای رێزگرتنی هەردوولا دەبێت، پێويستە ئەمريکا لە بابەتی پەکەکەدا لە ئاسايشی نەتەوەی تورکيا تێبگات، ئێمە دەمانەوێت رێوشوێنی کۆنکرێتی ببينين لەلايەن هاوپەيمانەکانمانەوە”.
هاوکات، وتەبێژی سەرۆککۆماری تورکيا سەبارەت بە پەيوەندييەکانی وڵاتەکەی لەگەڵ ميسر و وڵاتانی کەنداو رايگەياند: “دەکرێت پەڕەيەکی نوێ هەڵبدرێتەوە لە پەيوەندييەکانمان لەگەڵ ميسر، هەروەها لەگەڵ وڵاتانی کەنداو بەمەبەستی بەرقەراربونی ئاشتی و ئاسايش لە ناوچەکە”.
پەيوەندييەکانی نێوان تورکيا و وڵاتانی عەرەبی لە چەند پرسێکدا گرژی تیکەوتووە، بەتايبەت لە پرسی پشتيوانيکردنی تورکيا لە تيرۆر و دەستوەردانی لە کاروباری ناوخۆی چەند وڵاتێک.
سەبارەت بە پەيوەندييەکانی لەگەڵ پەکەکەدا، لە 10ی شوباتی ئەمساڵدا تورکيا ئۆپراسيۆنی چنگی هەڵۆی دووی لە چيای گارە راگەياند و چوار رۆژ دواتر وەزيری بەرگری تورکيا کۆتایهاتنی ئۆپراسيۆنەکەی راگەياند و وتی “13ديليان لەلايەن پەکەوە کوژراوە”، هەرئەوکاتە پەکەکە رايگەياند: “لە ئەنجامی تۆپبارانکردنی چياکە لەلايەن تورکياوە ئەو 13 ديلە کوژراوە”.
