کورسییەکەی پاپا پێگەیەکی بەردەوامی درایە لەناو ئەنجوومەنی وەزیراندا

SNN

فەرمانگەی پرۆتۆکۆڵی سەربە ئەنجوومەنی وەزیرانی عێراق رایگەیاند “کورسییەکەی پاپا فرانسیس پاپای ڤاتیکان کە لە پارێزگای زیقار وتاری لەسەر خوێندەوە، پێگەیەکی هەمشەیی دراوەتێ لەناو کۆشکی سەرۆکایەتیی ئەنجوومەنی وەزیرانی عێراقدا”.

فەرمانگەکە وەک رێز و هێمایەک لەبارەی گرنگیی و کەسایەتیی پاپای ڤاتیکان ئەو هەنگاوەی ناوە.

رۆژی 5ی ئەم مانگە پاپا فرانسیس لە فڕۆکەخانەی نێودەوڵەتیی بەغدا لەلایەن سەرۆکوەزیرانی عێراق، مستەفا کازمی و ژمارەیەک لە وەزیر و بەرپرسانی باڵای حکوومەتی عێراق و پیاوانی ئایینی کریستیان پێشوازی لێکرا.

لەگەڵ چوونە ناو هۆڵی پێشوازیی فڕۆکەخانە بە لێدانی گۆرانی و هەڵکردنی ئاڵای عێراق و ڤاتیکان پێشوازیی لە پاپا کرا.

دواتر بۆ خوێندنەوەی وتارێک و ئەنجامدانی قداسی کریستیان، پاپا سەردانی پارێزگای زیقاری کرد  لەناوچەی ئور-ی مێژوویی وتارێکی پێشکەشکرد.