بافڵ تاڵەبانی: مێژووی یەکێتی لێوڕێژە لە قوربانیدان بۆ ئەم خاکە، بۆیە نایکەینە قوربانی بەرژەوەندی شەخسی

SNN

هاوسەرۆکی یەكێتیی نیشتمانیی کوردستان دەڵێت: “لەگەڵ یەکدەنگی و یەکهەڵوێستی هێز و لایەنەکانین و بڕوامان بە کاری هاوبەش هەیە لەپێناو خزمەتکردنی خەڵکی خۆشەویستی کوردستان”.

ئاماژە بەوەشدەکات “هەموو هەوڵێکمان لەپێناو ژیانێکی ئارام و خۆشگوزەراندایە بۆ کۆمەڵانی خەڵکی کوردستان “.

ئەم وتانەی بافڵ تاڵەبانی لەمیانی کۆبوونەوەیەکیدا بوو لەگەڵ کۆمەڵەی پێشمەرگە دێرینە دانەبڕاوەکانی یەکێتی لە بارەگای مەکتەبی سیاسیی یەکێتی.

بافڵ تاڵەبانی ستایشی مێژووی زێڕین و درەوشاوەی کۆمەڵەی پێشمەرگە دێرینە دانەبڕاوەکانی کرد و رایگەیاند، ئەزموونی ئەمڕۆمان بەرهەمی خەبات و قوربانیدانی پێشمەرگە قارەمانەکانی کوردستانە. سەرۆکایەتی یەکێتیی نیشتمانیی کوردستان بە چاوی ڕێز و شکۆمەندییەوە لەو خەباتە دەڕوانێت و وەفادار دەبێت بەرامبەر هەوڵ و تێکۆشانی ئەوان لەپێناو کورد و کوردستان.

هاوسەرۆک ئاماژەی بە رۆڵ و گرنگیی کۆمەڵەی پێشمەرگە دێرینە دانەبڕاوەکان کرد و رایگەیاند، وەک چۆن پێشمەرگەکانمان لە رابردوودا سەرمەشقی شۆڕش و کوردایەتی بوون، ئێستاش دەبێت بە هەمان رۆحییەتی شۆڕشگێڕانەوە پێکەوە دەست لەناو دەست خەبات بکەین لە پێناو سەرخستنی ئەم ئەزموونە و کوردستان بگەیەنینە قۆناغێکی باشتر و خۆشگوزەرانتر.

بافڵ تاڵەبانی پەیام و ستراتیژی یەکێتی روونکردەوە و وتی: “ئێمە لەگەڵ یەکدەنگی و یەکهەڵوێستی هێز و لایەنەکانین و بڕوامان بە کاری هاوبەش هەیە لەپێناو خزمەتکردنی خەڵکی خۆشەویستی کوردستان، مێژووی یەکێتی لێوڕێژە لە قوربانیدان بۆ ئەم خاکە، بۆیە ئەو مێژووە پڕ لە شانازییە ناکەینە قوربانی بەرژەوەندی شەخسی و حیزبی و هەموو هەوڵێکمان لەپێناو ژیانێکی ئارام و خۆشگوزەراندایە بۆ کۆمەڵانی خەڵکی کوردستان”.