نێچیرڤان بارزانی: دەستخۆشییەکی تایبەت لە قوباد تاڵەبانی دەکەم

نێچیرڤان بارزانی، سەرۆکی هەرێمی کوردستان په‌سه‌ندكردنى بودجە بە سەرەتایەكی باش و هاندەرى چارەسەركردنی كێشەكانی دیكەی هەرێمی كوردستان و حكومه‌تى فيدراڵ ناودەبات. هەروەها دەستخۆشییەکی “تایبەت” لە قوباد تاڵەبانی و شاندەکەی و فراكسیۆنە كوردستانییەكان دەکات کە “پشتیوانی یەكدی بوون بۆ جێگیركردنی بەشی هەرێمی كوردستان لە بودجەی عێراقدا”.

نێچیرڤان بارزانی، سەرۆکی هەرێمی کوردستان لەپەیامێکدا بەبۆنەی پەسەندكردنی بودجه‌ى عێراقه‌وه‌، پيرۆزبايى له‌ گه‌لى عێراق و دەستخۆشی لە سەرۆكایەتى و هەموو فراكسیۆنەكانی ئەنجوومەنی نوێنەرانی عێراق دەکات.

لە پەیامەکەیدا سەرۆکی هەرێمی کوردستان هەوڵەكانی سەرۆكوەزیران مستەفا كازمی بۆ كەمكردنەوەی ناكۆكییەكان و رێككه‌وتن، بە مايه‌ى رێز و سوپاس ناودەبات و رایدەگەیێنێت: “بۆ چارسه‌ركردنى كێشه‌كان و سه‌قامگيرى و ئاوه‌دانى و ئاينده‌يه‌كى باشتر، عێراق پێويستى به‌ هاريكاريى هاوبه‌ش و كارى پێكه‌وه‌يى هه‌يه‌ و ده‌بێ هه‌موومان پشتيوانى له‌و ئاراسته‌يه‌ بكه‌ين”.

سەرۆکی هەرێمی کوردستان ده‌ستخۆشييه‌كى تایبەت لە قوباد تاڵەبانی سەرۆكی شاندی دانوستاندنكاری حكومەت دەكات كە “له‌گه‌ڵ ئەندامانی شاندی هەرێمی كوردستان به‌ پشوودرێژی و سه‌ركه‌وتووانه‌ دانوستاندنێكی سەختیان تێپەڕاند”. هەروەها دەستخۆشی لە فراكسیۆنە كوردستانییەكان ده‌کات كە “هاوكار و پشتیوانی یەكتر و شاندی حكومەت بوون بۆ جێگیركردنی بەشی هەرێمی كوردستان لە بودجەی عێراقدا”.

نێچیرڤان بارزانی هیوادارە هه‌موو لايه‌ك پابه‌ندى یاساكە بن و دەڵێت: “په‌سه‌ندكردنى بودجە دەتوانێت سەرەتایەكی باش و هاندەرى چارەسەركردنی كێشەكانی دیكەی هەرێمی كوردستان و حكومه‌تى فيدراڵ بێت. جێبه‌جێكردنى یاساكه‌ دەبێته‌ هۆی بەهێزكردنەوەی پرۆسەی سیاسی و پێكه‌وه‌ژيان و چەسپاندنی مافی هاووڵاتیبوون بۆ هەمووان. دەرگای گفتوگۆیەكی بەرهەمدار بۆ هەموو لایەنەكان ده‌كاته‌وه‌ تا پێكه‌وه‌ له‌پێناو سەقامگیری و ئاوەدانی و پێشكه‌وتنى وڵاتدا كار بكه‌ن”.