لەبارەی جۆرێکی دۆلارەوە هۆشداری دەدرێت

SNN

بەشێک لە هاووڵاتییانی ناوچە جیاوازەکان مامەڵە بە جۆرێکی دۆلار دەکەن کە پێی دەوترێت “دۆلاری لیبی”، وتەبێژی بازاڕی دۆلارەکەی سلێمانیش دەڵێت: “ئەو دۆلارە ساختەیە و داوا لە هاووڵاتیان دەکەم نەکەونە ئەو فێڵەوە”.

جەبار گۆران، وتەبێژی بازاڕی دۆلارەکەی سلێمانی لە لێدوانێکیدا بۆ SNN رایگەیاند: “ئەو دەنگۆیەی بڵاوبووەتەوە ئەوەیە کە دۆلاری ئەمریکی بلۆککراو لە بانکەکانی لیبیاوە لەکاتی بەهاری عەرەبیدا براونەتەوە دەرەوەی وڵات و گەیشتووەتە عێراق، بەڵام ئەوەی کە مامەڵەی پێوەدەکرێت ئەو دۆلارە نییە بەڵکو دۆلاری ساختەیە”.

جەبار گۆران رایگەیاند: “ئەوەی کە لە ئارادایە دۆلاری ساختەکراوە نەک پارەی بلۆککراوی وڵاتان، مامەڵەیەکی تەواو نایاسایی بەو دراوە ساختەیە دەکرێت و بە نرخی نیوە دەگۆڕێردرێتەوە”.

وتیشی: “ئەو مامەڵەیە بە دۆلاری ساختە لە سلێمانی ناکرێت، بەڵام لە کەرکوک ئەنجامدراوە و خەڵک هەبووە پارەیەکی زۆری عێراقی گۆڕیوەتەوە بۆ دۆلاری ساختە و دواتر زەرەری کردووە”.

وتەبێژی بازاڕی دۆلارەکە داوا لە هاووڵاتیان دەکات نەکەونە فێڵی لەوجۆرەوە.

لەبارەی بەهای دۆلارەوە وتی: “لەئێستادا 100 دۆلاری ئەمریکی بەرامبەر بە 148 هەزار و 150 دینارە”.