بافڵ تاڵەبانی لەگەڵ باڵیۆزی بەریتانیا کۆبووەوە

SNN

بافڵ تاڵەبانی، لەگەڵ باڵیۆزی بەریتانیا لە عێراق کۆبووەوە و دوایین پەرەسەندنە سیاسی و ئابووری و ئەمنییەکانیان تاوتوێکرد.

لە کۆبوونەوەکەی هاوسەرۆکی یەکێتی لەگەڵ ستیڤن هیکی، و جەخت لە تەبایی و لێکنزیکبوونەوەی لایەنەکان لەپێناو چارەسەرکردنی کێشەکان کرایەوە. پەسەندکردنی بودجەی عێراق وەک هەنگاوێکی گرنگ و ئیجابی وەسفکرا و سەرەتایەک بێت بۆ کۆتاییهاتنی ناکۆکییەکانی نێوان هەرێم و بەغدا.

بافڵ تاڵەبانی هەڵوێست و بڕیاری یەکێتی روونکردەوە و جەختی لە کاری هاوبەشی نێوان هێز و لایەنە سیاسییەکانی هەرێم کردەوە و رایگەیاند: “سەقامگیری هەرێم و خۆشگوزەرانی خەڵکی کوردستان کاری لەپێشینەی ئێمەیە و دەبێت هەموو هەوڵەکانمان لەو پێناوەدا بێت. بیرکردنەوەیەکی نیشتمانیمان هەبێت و دووربکەوینەوە لە ناکۆکییە کەسی و حیزبییەکان”.

هەڵبژاردنی پێشوەختەی عێراق تەوەری تری کۆبوونەوەکە بوو و بافڵ تاڵەبانی خواستی یەکێتی بۆ ئەنجامدانی هەڵبژاردن لە وادەی خۆیدا دووپاتکردەوە و رایگەیاند، دەبێت هەڵبژاردنی ئەنجوومەنی نوێنەرانی عێراق بە شێوەیەکی پاک و بێگەرد و بە چاودێری ناوەندە نێودەوڵەتییان لە کاتی خۆیدا ئەنجامبدرێت و گوزارشت لە ویست و ئیرادەی سەرجەم پێکهاتە و لایەنەکان بکات.