“بارودۆخەکە لە ڕووى کۆرۆناوە زۆر خراپە بەڵام هاووڵاتیان لەگەڵى ڕاهاتوون”

SNN

وتەبێژی تەندروستی سلێمانی رایگەیاند: لە نەخۆشخانەکانى تایبەت بە کۆرۆنا 31 تووشبووى کۆرۆنا بارودۆخیان خراپە و ژیانیان لە مەترسیدایە بۆیە بە ڕاشکاوى دەڵێن دۆخەکە مەترسیدارە بەڵام هاووڵاتیان لەگەڵى ڕاهاتوون”.

د.یاد نەقشبەندى، وتەبێژی تەندروستی سلێمانی بە SNNى راگەیاند”ئەو سێ جۆرە ڤاکسینەى تاوەکو ئێستا گەیشتووەتە دەستمان هاووڵاتیان بەکاریانهێناوە و خۆشبەختانە هیچ حاڵەتێک نەخوازراو و خوێن مەیین بە هۆى ئەو ڤاکسینانەوە تۆمار نەکراوە”.

وتیشى”ڤاکسینى ڤایزەر و ئەسترازینیکا و سینۆفارمی چینی یەک بابەتە و لەلایەن ڕێکخراوى تەندروستى جیهانیەوە پەسەند کراوە، بۆیە هاووڵاتیان دڵنیا دەکەینەوە ڤاکسین لە ئێستا باشترین ڕێگا چارەیە بۆ ڕێگریى کردن لە تووشبوون بە کۆرۆنا و ئەرکى حکومەتیشە زۆرترین بڕە ڤاکسین دابین بکات و بۆ ئەوەى پێدانى ڤاکسین خێراتر بکرێت”.

هاوکات ئاماژەى بەوەشکرد”دروست بوونى قەرەباڵغى و کەم تەرخەمى لە جێبەجێ کردنى ڕێنمایە تەندروستیەکان واى کرد کۆرۆنا هەڵبکشێت بۆیە پێویستە هاووڵاتیان بەردەوام بن لە خۆ پارێزى و کۆرۆنا تێکەڵى ملمڵانێکان نەکرێت”.