نزیکەی 50 پەرلەمانتار کۆرۆنایانە و 11 یان حاڵیان باش نییە
ئەنجوومەنی نوێنەرانی عێراق | فۆتۆ: راگهیاندنى ئهنجوومهنى نوێنهران
SNN
بە گوێرەی هەندێک سەرچاوە لە میدیای عێراقەوە، نزیکەی 11 پهرلهمانتاری عێراق بەهۆی تووشبوونیان بە کۆرۆنا باری تەندروستییان جێگیر نییە.
میدیای عێراق دەشڵێت “لهكۆی 329 پهرلهمانتاری عێراق، تا ئێستا 50 پهرلهمانتار تووشی ڤایرۆسی كۆرۆنا بوون و 11یان لەژێر ئۆکسجیندان”.
دوێنێ پێنجشەممە بەهۆی تووشبوونی بە ڤایرۆسی کۆرۆنا، عەدنان ئەسەدی پەرلەمانتار و سەرکردە لە حیزبی دەعوە پاش دوو هەفتە مانەوە لە نەخۆشخانە، گیانیلەدەستدا.
پێش دوو هەفتە لەمەوبەر نووسینگەی تایبەتی عەدنان ئەسەدی سەرکردەی دیاری حیزبی دەعوە رایگەیاندبوو کە پاش خراپبوونی دۆخی تەندروستی بەهۆی کۆرۆناوە، گواستراوەتەوە بۆ نەخۆشخانە.
لەوەتەی ڤایرۆسی کۆرۆنا لە عێراق سەریهەڵداوە، ئەمە پێنجەم پەرلەمانتاری ئەنجوومەنی نوێنەرانی عێراقە بەهۆی تووشبوونیان بەو پەتایە گیانیانلەدەستداوە.
پێشتر هەریەک لە ئارام ناجی، غەیدا کمبس، حسێن زهێری، عەلی عەبودی-ش کە پەرلەمانتار بوون، پاش تووشبوونیان بە کۆرۆنا گیانیانلەدەستداوە.
عەدنان ئەسەدی لە سەردەمی ئەنجوومەنی حوکمەوە لە عێراق وەک سیاسی دەسەڵاتی هەبووە لە وەزارەتی ناوخۆ و ساڵی 2010 بووەتە وەزیری ناوخۆ لەسەردەمی نوری مالیکی و دواتر چووەتەوە ئەنجوومەنی نوێنەران وەک نوێنەری پارێزگای موسەننا.
