حکومەتی هەرێم وردەکاری دانانی باج رووندەکاتەوە

SNN

فەرمانگەی هەماهەنگی و بەدواداچوونی حکومەتی هەرێمی کوردستان راپۆرتی چاکسازی لە بواری باج رەوانەی پەرلەمانی کوردستان کرد و ئاماژە بە گرتنەبەری چەند رێکارێکیش دەکات لەو بوارەدا.

فەرمانگەی میدیا و زانیاری حکومەتی هەرێمی کوردستان رایگەیاندووە: “لە چوارچێوەی هێڵە گشتییەکانی حکومەتی هەرێمی کوردستان لە بواری چاکسازی کە پێداگرى لەسەر چاکسازیی سیستەمی باج بە شێویەکی دادپەروەرانە دەکاتەوە لە وەرگرتنی باج و گرتنەبەری هەموو رێکارێکی یاسایی و کارگێڕی بۆ رێگەگرتن لە خۆدزینەوە لە باج و میکانیزم و پێوەری تازە بۆ رێکخستنی باج چەند هەنگاوێک گیراونەتەبەر.

لەبارەی ئەو هەنگاوانەشەوە روونیکردوەتەوە: “دانانی باجی دەرامەت لەسەر بەرهەمە نەوتی و سوتەمەنییەکان و مەوادی کیمیایی تایبەت بە سوتەمەنییەکان و پاشەڕۆی سوتەمەنییەکان، کە ئەم بڕیارە لە مانگی ئادارەوە کەوتوەتە بواری جێبەجێ کردنەوە و 7% باج لە بە ها لە کاتی هاوردەکردن و 4% باج لە کاتی هەناردەکردن وەردەگیرێت”.

راشیگەیاند: “مامەڵەی هیچ کۆمپانیایەکی نەوت و گاز راییناکرێت تا پاکانەی باجی لەگەڵدا نەبێت و وردبینیی بڕی باجی خەمڵێنراو لە لایەن وەزارەتى سامانە سرووشتییەکان ئەنجام دەدرێت”.

هەر لە چوارچێوەی رێکارەکاندا ئاماژە بەوەکراوە: “دەبێت سەرجەم کۆمپانیاکانی دابینکار خۆیان لە وەزارەتی سامانە سرووشتییەکان و بەڕێوەبەرایەتیی گشتیی تۆماری کۆمپانیاکان لە وەزارەتی بازرگانی و پیشەسازی، تۆمار بکەن”.

لە کۆتاییشدا رایگەیاندووە: “بڕیاری وەرگرتنی باج لە کارمەندی بیانیی بواری نەوت و گازیش لە مانگی کانونی دووەمی ئەمساڵەوە کەوتوەتە بواری جێبەجێکردنەوە”.