حکومەتی هەرێم وەڵامی ئەمنستی دەداتەوە
لۆگۆی حکومەتی هەرێم | فۆتۆ: SNN
SNN
نووسینگەی رێکخەر بۆ راسپاردە نێودەوڵەتییەکان لە حکومەتی هەرێمی کوردستان وەڵامی راگەیەندراوێکی رێکخراوی ئەمنستی ئینتەرناشناڵ دەداتەوە لە بارەی سزادانی پێنج رۆژنامەنوس و چالاکوانی بادینان و تیایدا باس لەوە دەکات: سزادانی ئەو کەسانە پەیوەندی بە پیشەی رۆژنامەگەری و چالاکوانیەوە نەبووە.
لە وەڵامەکەیدا نوسینگەی رێکخەر بۆ راسپاردە نێودەوڵەتیەکان رایگەیاندووە: “دادگا سەربەخۆیە لە حکومەت و حکومەتی هەرێمی کوردستان دەست لە پرۆسە یاساییەکان وەرنادات”.
راشیگەیاندووە: “حوکمی پێنج سزادراوەکە هیچ پەیوەندییەکی بە پیشەی رۆژنامەگەری و چالاکوانییەوە نەبووە، بەڵگەکان ئاماژە بەوە دەکەن کە تاوانباربوون بە کۆکردنەوەی زانیاری نهێنی و گواستنەوەیان بۆ بۆ رێکخراوێک کە زۆرجار بەشداری لە چالاکی تیرۆریستیدا کردووە”.
ئەمەش دوای ئەوەدێت، کە رێکخراوی لێبوردنی نێودەوڵەتی (ئامنستی ئینتەرناشناڵ) لە راگەیەنراوێکدا نیگەرانی خۆی لە پەسەندکردنی سزای زیندانیکردنی پێنج رۆژنامەنوس و چالاکوانی بادینان دەربڕیبوو، بڕیارەکەشی بە سەرپێچیکردن لە ستانداردەکانی دادگایەکی دادپەروەرانە ناوبردوو.
سزادانی ئەو رۆژنامەنوسان و چالاکوانانە لەسەر ئاستی ناوخۆ و دەرەوەی هەرێم ناڕەزایەتی زۆری بەدوای خۆیدا هێناوە و هەر ئەمڕۆ یەکێتی ئەوروپا نیگەرانی خۆی لە سزادانی ئەو پێنج کەسە دەربڕی و رایگەیاند: “ئەم بڕيارانە بەشێوەيەکی نەرێنی کاريگەری دەبێت لەسەر کپکردنی دەنگی ناڕازی لە هەریمی کوردستان، هەروەها رۆژنامەنوسان نابێ بە ترس و سنووردانانەوە کارەکانيان بکەن”.
