ئەوقاف “سندوقی کۆکردنەوەی زەکات دادەمەزرێنین”

SNN

بەڕێوەبەری توێژینەوە و ئیرشاد لە وەزارەتی ئەوقاف و کاروباری ئایینی رایگەیاند: حکومەتی هەرێمی کوردستان سندوقێک بۆ کۆکردنەوەی زەکات و خێر دامەزرێنێت.

ئیبراهیم محەمەد، بەڕێوەبەری توێژینەوە و ئیرشاد لە وەزارەتی ئەوقاف و کاروباری ئایینی لەلێدوانێکدا ئاشکرایکرد، حکومەتی هەرێمی کوردستان سندوقێک بۆ کۆکردنەوەی زەکات و خێر دامەزرێنێت و ئەنجومەنێکی 9 کەسی سندوقەکە بەڕێوەدەبەن، وەزیری ئەوقاف و کاروباری ئایینی سەرۆکایەتی دەکات.

ئیبراهیم محەمەد ئاماژەی بەوەش کردووە، “وەزارەتی ئەوقاف و کاروباری ئایینی بڕیاری بۆ دامەزراندنی بەڕێوەبەرایەتیی سندوقی زەکات و خێر داوە و بەمنزیکانە فەرمانی بۆ دەردەچێت و ئەنجومەنێکی بۆ دروستدەکرێت کە بەپێی یاسای 55ی ی ساڵی 1987ی عێراقی کاردەکات”.

ئاماژەی بەوەشکرد، “سندوقەکە بۆ کۆکردنەوەی پارەی زەکات و خێرە و دەمانەوێت لەو رێگەیەوە باشتر پارەی زەکات دابەشبکرێت. سندو قەکە ئەژماری بانکی بۆ دەکرێتەوە و شەفافانە کارەکانی رادەپەڕێندرێن، لە هەموو شوێنێکەوە پارە وەردەگرێت و خەڵک ئازادە زەکات بداتە سندو قەکە یان بە شوێنی دیکە، واتە ئێمە بەزۆر پارە لە خەڵک وەرناگرین”.

لەبارەی ئەو کەسانەی کە سودمەند دەبن لەسندوقەکە، بەڕێوەبەری توێژینەوە و ئیرشاد لە وەزارەتی ئەوقاف و کاروباری ئایینی دەڵێت، “ئەو کەسانەی کە شیاون دەتوانن سودمەند بن لێی، هەروەها حکومەت لە کوێ پێویستی بە پڕۆژەی خێرخوازی وەکو قوتابخانە یان نەخۆشخانە هەبو سندو قەکە دەتوانێت هاوکار بێت”.