ليوا قارەمان لەبارەی گەڕانەوەی پێشمەرگە بۆ کەرکوک روونکردنەوە دەدات

SNN-عەلی حەمە سەعید

جێگری سوپاسالاری هێزی پێشمەرگەی كوردستان رايگەياند: “ئەوەی باسی لێوەدەكرێت گوایە هێزەكانی پێشمەرگە دەگەڕێنەوە سنووری پارێزگای كەركوك و ناوچە كێشەلەسەرەكان، لێكدانەوەی هەڵەی بۆكراوە، چونكە تا ئێستا لەگەڵ سوپای عێراق ئەوبابەتەمان گفتوگۆنەكردووە”.

لیوا قارەمان كەمال، جێگری سوپاسالاری پێشمەرگە بە SNNی راگەیاند: “بەمەبەستی دروستكردنی زیاتری هەماهەنگی لە نێوان هێزەكانی پێشمەرگە و هێزەكانی سوپای عێراق لە سنووری پارێزگای كەركوك و موسڵ، وابڕیارە كە لەم هەفتەیەدا ژمارەیەك لە ئەفسەرانی هێزەكانی پێشمەرگە بگەڕێنەوە ژووری هەماهەنگی هاوبەش لە نێوان هێزەكانی پێشمەرگە و هێزی عیراقی لە سنوری پارێزگای كەركوك و بە دیاریكراوی سەربازگەی كەی وەن”.

ئاماژەی بەوەشكرد: “دیارە لێكدانەوەی هەڵە بۆ قسەكانی من كراوە كە گوایە من وتبێتم هێزەكانی پێشمەرگە دەڕێنەوە كەركوك و ناوچە جێناکۆکەکان، بۆیە تا ئێستا ئەو بابەتەمان لەگەڵ سوپای عێراق باس نەكردووە، هاوكات هەفتەی رابردوو ئەفسەرانی وەزارەتی پێشمەرگە لە ژووری هەماهەنگی هاوبەش لە دیالە دەوامیان كردووە و لە چەند رۆژی داهاتووشدا بڕیاری تایبەت بە مەخموور و موسڵیش دەكەوێتە بوار جێبەجێكردنەوە”.

وتەكانی جێگری سوپاسالاری هێزی پێشمەرگە لەكاتێكدا كە بەهۆی دروستبوونی بۆشایی ئەمنی لە ناوچەكەدا، ناوبەناو چەكدارانی تیرۆریستی داعش هێرش دەكەن سەر هێزەكانی سوپای پێشمەگەرگە لە سنوری كەركوك و دەوروبەری و بەوهۆیشەوە تا ئێستا چەند پێشمەرگەیەك شەهید بوون.