هیومان رایتس وۆچ: بکوژانی چالاکوانانی عێراق لایەنی سیاسییان لە پشتەوەیە

SNN

رێکخراوی هیومان رایتس وۆچ رایگەیاند: “ئەو گروپە چەکدارییانەی چالاکوانانی عێراق دەکەنە ئامانج لایەنی سیاسییان لە پشتە و هیچ ترسێکیان لە سزادان نییە”.

لە راپۆرتێکی رێکخراوەکەدا لە سەر رەوشی مافەکانی مرۆڤ لە عێراق باس لەوە کراوە، لە ماوەی یەک ساڵ و نیوی دوای خۆپیشاندانەکان، 81 هەوڵی کردنەئامانجی چالاکوان و رۆژنامەنووسان دراوە و کە 34 هەوڵیان بە ئەنجام گەیشتووە.

باسی لەوەشکردوە: ” چەکدارەکان لەناو شەقامەکانی شارە گەورەکانی عێراق تەقە لە چالاکوان و رۆژنامەنووسان دەکەن و هیچ ترسێکیان لە سزادان نییە، چونکە حزبی سیاسییان لە پشتە و نوێنەریان لە پەرلەمان هەیە”.

هیومان رایتس وۆچ هۆشداریشی داوە لەوەی، کە ئەگەر ئەو گروپ و کەسانەی چالاکوانان دەکەنە ئامانج بە سزای یاسایی نەگەن، بەردەوامی کردنە ئامانجی چالاکوانان و رۆژنامەنووسانی رەخنەگر کاریگەری لەسەر پرۆسەی هەڵبژاردنی پێشوەختە دەبێت کە بڕیاروایە مانگی کانونی یەکەمی ئەمساڵ بەڕێوە بچێت.