ئێران: ئامادەین ڤیزا لەگەڵ عێراق هەڵبگرین

SNN

یاریدەدەری وەزیری دەرەوەی ئێران بۆ کاروباری دیپلۆماسی ئابوری ئامادەیی وڵاتەکەی بۆ هەڵگرتنی ڤیزا لەگەڵ عێراق دەربڕی و جەختی کردەوە: “هەر کات بەغدا هەمان خواستی هەبێت دەستبەجێ بڕیارەکە جێبەجێ دەکرێت”.

رەسوڵ موهاجیر یاریدەدەری وەزیری دەرەوەی ئێران بۆ کاروباری دیپلۆماسی ئابوری لە میانی کۆبوونەوەیەکدا لەگەڵ ژمارەیەک بازرگان و وەبەرهێنەری وڵاتەکەی و عێراق لە بەغدا رایگەیاند: “لەکۆبوونەوەی هەفتەی رابردووی کابینە بە سەرۆکایەتی حەسەن رۆحانی سەرۆککۆمار بڕیاردرا لەئەگەری ئامادەیی حکومەتی عێراق ڤیزا لە نێوان هەردوو وڵات هەڵبگیرێت”.

باسی لەوەشکرد: ” بۆیە چاوەڕێی حکومەتی عێراقین تا ئەویش بڕیاری هاوشێوە بدات و لەوەها ئەگەرێکیش چیتر هاووڵاتیانی ئێرانی و عێراقی پێویستیان بە وەگرتنی ڤیزا نابێت بۆ هاتووچۆ”.

یاریدەدەری وەزیری دەرەوەی ئێران روونیشیکردەوە: “لە دۆخی ئێستادا و بە هۆی بڵاوبوونەوەی کۆرۆنا هاوشێوەی وڵاتانی دیکە چەندین رێکاری خۆپارێزی گیراونەتەبەر، بەڵام ئەوەش نەبووەتە رێگر لەبەردەم هاتوچۆی نێوان ئێران و عێراق و بە ئەنجامدانی پشکنینی کۆرۆنا هاووڵاتیانی هەردوولا دەتوانن گەشتەکانیان ئەنجام بدەن”.