56 پەرلەمانتار داوای هەڵوەشاندنەوەی لێبڕینی مووچە دەکەن

SNN

لە یاداشتێکدا بۆ دەستەی سەرۆکایەتی پەرلەمانی کوردستان 56 پەرلەمانتار داوا دەکەن دانیشتنی داهاتووی پەرلەمان لە بارەی بەردەوامی لێبڕینی مووچە بێت و بڕیار بدرێت بە هەڵوەشاندنەوەی ئەو لێبڕینە.

لە یاداشتی ئەو 56 پەرلەمانتارەدا هاتووە: ” بە پێی ماددی 48 بڕگەی چوارەم لە پێڕەوی ناوخۆی پەرلەمانی کوردستان، ئێمە ژمارەی یاسایی ئەندامانی پەرلەمان داواکارین دانیشتنی ئایندەی پەرلەمان تەرخان بکرێت بۆ گفتوگۆکردن و بڕیاردان لەبارەی لێبڕینی مووچە”.

داواشیان کردوە: “ئەو دۆسیانە بخرێنە بەرنامەی کاری دانیشتنی پەرلەمان، کە بە هۆکاری لێبڕینی مووچە دادەنرێن و بریتین لە خەرجی و داهاتی نەوت، خاڵە سنووریەکان و جێبەجێنەبوونی یاسای چاکسازی”.

لەکۆتاییشدا ئەو پەرلەمانتارانە رایانگەیاندوە: “لە ئەگەری ئامادەبوون و ئامادەنەبوونی حکومەت پەرلەمان بڕیاری یاسایی بدات بۆ هەڵوەشاندنەوەی لێبڕینی مووچە و دابەشکردنی مانگانەی”.