عێراق و ئێران لەبارەی وشکەساڵی و بەردانەوەی ئاوەوە گفتووگۆ دەکەن

SNN

وەزیری سەرچاوە ئاوییەکانی عێراق رایگەیاند: دوای کەمبووەنەوەی بەردانەوەی ئاو بە رێژەی 70٪ بەراورد بە ساڵی رابردوو، لەگەڵ ئێران دانوستان دەکەن.

مەهدی رەشید، وەزیری سەرچاوەکانی عێراق لە کۆنگرەیەکی رۆژنامەوانیدا رایگەیاند : “ئەمساڵ ئاو زۆر کەمە، هۆکاری سەرەکیشی بۆ کەمی بارانبارین و نەبوونی بەفری چیاکان دەگەڕێتەوە، ئەمەش کاریگەری لەسەر بەردانەوەی ئاو لە لایەن وڵاتانی دراوسێ هەبووە، بە تایبەت ئێران”.

لە ماوەی رابردوودا وەزیری سەرچاوە ئاوییەکانی عێراق دوای سەردانێکی بۆ بەنداوی دوکان رایگەیاند: وەزارەتەکەی لەگەڵ لایەنی ئێران دەستی بە جووڵە کردووە، لە چەند رۆژی داهاتوودا کۆبوونەوەیەکی هونەری لەسەر ئاستێکی باڵا بەڕێوەدەچێت، کە تەوەری سەرەکی بەردانەوەی ئاو بۆ بەنداوی دوکان و دەربەندیخان و رووباری کارون لە باشووری عێراق دەبێت.