کردنەوەی کۆلێژی ددان لە زانکۆ ناحکومییەکان ناڕەزایەتی لێکەوتەوە

SNN

سەندیكای پزیشكانی ددانی كوردستان رایگەیاند: “هەرێمی كوردستان ساڵانە پێویستی بە 150 بۆ 200  پزیشكی ددان هەیەن بەڵام ئێستا 500 پزیشكی ددان ساڵانە دەردەچن، بۆیە نیگەرانن لەكردنەوەی كۆلێژی ددان لە زانكۆ ناحکومییەکان”.

سەندیكای پزیشكانی ددانی كوردستان لەراگەیەنراوێکدا كە بۆ سێ سەرۆكایەتیەكەی هەرێمیان ناردوە نیگەرانی خۆیان لە كردنەوەی كۆلێژی ددان لە زانكۆ ناحکومییەکان دەردەبڕن و تیایدا باسیان لەوەکردووە: “هەرێمی كوردستان ساڵانە پێویستی بە 150 بۆ 200 پزیشكی ددان هەیەن بەڵام ئێستا 500 پزیشكی ددان ساڵانە دەردەچن، بۆیە لە ئێستادا هیچ پێویستییەك بە كردنەوەی كۆلێژەكانی ددان نیە”.

راشیگەیاندوە: “بەگوێرەی رێنماییەکانی پزیشکی دەرچوانی کۆلێژی پزیشکی ددان پێویستە دوای دەرچونیان راستەوخۆ دابمەزرێن و ماوەی دوو ساڵ کار بکەن بۆ ئەوەی بەتەواوی فێری پیشەکەیان ببن و بتوانن چارەسەری نەخۆش بکەن، بەڵام لەئێستادا زیاتر لە هەزار دەرچوی دانەمەزراو هەیە و داوا دەکەن پێدانی مۆڵەت بەکردنەوەی کۆلێژی ددان لەزانکۆ حکومی و ناحکومییەکانیش رابگیرێت.

جەختیشیان کردوەتەوە: “کەبە گوێرەی یاسای ژمارە 3ی ساڵی 2013 دەبێت بە گوێرەی پێویستی بازاڕی کار زانکۆ لە هەرێمدا دابمەزرێت و لە کاتی ئێستادا هیچ پێویستییەک بە کردنەوەی ئەو کۆلێژانە نییە، بۆیە داواکارین کردنەوەی ئەو کۆلێژانە بوەستێنرێت و وەرگرتنی خوێندکاران لەو سێ کۆلێژە حکومی و دوو کۆلێژە ئەهلیەی کە هەیە رێکبخرێتەوە و دەرچووەکان دابمەزرێن”.