خاوەنکارێک لە لایەن کرێکارەکانیەوە کوژرا

SNN

لە گەڕەکی رزگاریی شاری سلێمانی هاووڵاتیەک بە ناوی(ع.ح.س) کوژرا و کەسوکارەکەشی دەڵێن: ” کرێکارەکانی لە پێناو دزینی ئۆتۆمبێلەکەی کوشتوویانە”.

لەو بارەوە ئیبراهیم فەتاح ئامۆزای کوژراوەکە بە SNNی راگەیاند: ” کوژراوەکە لە گەڕەکی رزگاری سەرپەرشتی نۆژەنکردنەوەی خانووی برایەکی کردووە و سێ کرێکاری عەرەبی هەبووە”.

وتیشی: “شەوی رابردوو سەردانی خانووەکەی کردووە و کرێکارەکان بە چەکوش کوشتوویانە و دواتر ئۆتۆمبێلەکەیان بردووە و هەڵاتوون”.

باسی لەوەشکرد: ” تائێستا چاوەڕێی هێزە ئەمنییەکانین بۆ ئەوەی لە بارەی ئەو تاوانەوە زانیاری تەواومان دەستبکەوێت”.

راشیگەیاند: “ئەو هاووڵاتییەی کوژراوە تەمەن 61 ساڵ بووە و خاوەنی سێ کچ و دوو کوڕە” و جەختیشی کردەوە، “هیچ کێشەیەکیان لەگەڵ کەسدا نەبووە”.