خەرجنەکردنی شایستە داراییەکان هۆکاری خراپی رێگاوبانی گەرمیانە

SNN

بەڕێوەبەری رێگاوبانی گەرمیان رایگەیاند: “هۆکاری سەرەکی خراپی رێگاوبانی سنوری گەرمیان و تەواونەکردنی پرۆژەکان خەرجنەکردنی شایستە داراییەکانە”.

عەدنان خەلیل بەڕێوەبەری رێگاوبانی گەرمیان لە لێدوانێکدا باسی لەوەشکردوە: “یەکێک لە پرۆژەکان پرۆژەی بە دووسایدکردنی رێگای سەرەکی نیوان کەلار_دەربەندیخانە کە ئەم پرۆژەیە لە 19/12/2017  دەستبەکار بوین و بە دوو قۆناغ چوەتە بواری جێبەجێ کردنەوە کە هەر دەستپێکی پرۆژەکە لەگەڵ هاتنی قەیرانەکاندا بوو، کە قۆناغی یەکەمی 24 کیلۆمەترە لە کەلارەوە دەست پیدەکات و تەواو بوە و قۆناغی دووەمی 41 کیلۆمەترەو تا ناو دەربەندیخانە.

راشیگەیاندوە: “بەهۆی ئەوەی ماوەی ساڵ و نیوێک پرۆژەکە هیچ شایستە داراییەکی بۆ تەرخان نەکراوە نەتوانراوە پرۆژەکە لەکاتی خۆیدا تەواو بکرێت و دواتر لە مانگی 4ی 2019 دوای سەردانێکی قوباد تاڵەبانی جێگری سەرۆکی ئەنجومەنی وەزیران دوبارە بڕێکی تر شایستە دارایی بۆ پرۆژەکە خەرج کراو دواتر بەهۆی قەیرانەکان و دۆخی کۆرۆناوە دووبارە بودجەکەی بۆ ماوەی 8 مانگ وەستاوە.

ئەوەشیخستەروو کە، بودجەی گشتی پرۆژەکە نزیکەی 138 ملیار دینارە و هەتا ئێستا 62 ملیاری بۆ سەرف کراوە و بۆ ئەمساڵ ئێمە داوای 70 ملیار دینارمان کردوە بۆ تەواوکردنی پرۆژەکە بەڵام بەنوسراوێکی ئەنجومەنی وەزیران بڕی 10 ملیاری بۆ تەرخانکراوە بۆ ساڵی 2021 کەئەو بڕە پارەیە کەمە بەڵام کەمێک پرۆژەکە ئەباتە پێشەوەو ئەگەری تەواوبونی 70٪ی پرۆژەکە هەیە.