لە هێرشێکی چەکداری بۆ سەر بارەگای هەدەپە کەسێک کوژرا

SNN

لە ئیزمیر ئەمڕۆ پیاوێک هێرشدەکاتەسەر بارەگای پارتی دیموکراتی گەلان (هەدەپە) و کچێک دەکوژێت کە لە 20ەکانی تەمەنیدایە، هەوڵیشیداوە ئاگر لە بارەگاکە بەربدات.

هەدەپە لە راگەیەندراوێکدا وتی ئەو ژنەی کوژراوە ناوی دەنیز پۆیراز-ە، لە نوسینگەکە کارناکات بەڵکو لەجێگەی دایکی دەوامی کردووە و کارەکانی بەڕێکردووە کاتێک دایکی مۆڵەتی وەرگرتووە.

پۆلیسی ئیزمیر ئەمڕۆ رایگەیاند تۆمەتبارەکەیان دەستگیرکردووە کە بەنیازیش بووە بارەگاکە بسوتێنێت، لە دانپێدانانیشدا وتوویەتی “رقم لە پەکەکە بووە بۆیە ئەو هێرشەم کردووە”، ئەمە لەکاتێکدایە حکومەتی تورکیا هەدەپە تۆمەتباردەکات بەوەی پەیوەندی بە پەکەکەوە هەیە و هەدەپەش ئەوە رەتدەکاتەوە.

هەدەپە ئۆباڵی روودانی ئەو هێرشە دەخاتە ئەستۆی حکومەتی تورکیا بەتایبەت وەزارەتی ناوخۆ و هەردوو حزبی ئاکەپە و مەهەپەش، هەدەپە پێی وایە ئەوان هاووڵاتییان لە دژی پارتەکە هاندەدەن.

هەدەپە لە هەڵبژاردنی پێشووتردا توانی 55 کورسی لەکۆی 600 کورسی بەدەستبهێنێت، بەڵام حکومەتی تورکیا بە تۆمەتی پەیوەندیبوون بە پەکەکە سەدان ئەندامی پارتەکە و ژمارەیەک پەرلەمانتاری زیندانی کردووە.