پەرلەمانتارێکی عێراق: بەغدا و هەولێر گەیشتوونەتە رێککەوتن لە سەر دۆسیە هەڵپەسێردراوەکان
SNN
ئه‌ندامێكی لیژنه‌ی وزه‌ی پەرلەمانی عێراق رایگه‌یاند، سەردانی شاندی هەرێم بۆ بەغدا بە سەرۆکاییەتی قوباد تاڵەبانی بووە هۆکارێک بۆ ئەوەی هەردوولا لەسەر دۆسیە هەڵپەسێردراوەکانی نێوانیان بگەنە رێککەوتن.
ئه‌مجه‌د عیقابی، ئه‌ندامی لیژنه‌ی وزه‌ی په‌رله‌مانی عێراق بە ئاژانسی فەرمی هەواڵی عێراقی راگەیاندوە: “سه‌ردانه‌كانی شاندی هه‌رێم به‌سه‌رۆكایه‌تی قوباد تاڵه‌بانی بۆ به‌غدا بووە هۆكارێك بۆئه‌وه‌ی هه‌ردولا بگه‌نه لێكتێگه‌یشتنی كۆتایی له‌سه‌ر كێشه هه‌ڵپه‌سێردراوه‌كانی ساڵانی رابردوی نێوان هه‌ولێر و به‌غدا.”
راشیگەیاند: “لێكتێگه‌یشتنه‌كان ته‌نها له‌باره‌ی خاڵه‌كانی بودجه‌وه نیین، به‌ڵكو دۆسیه‌كانی وزه و چاودێری دارایی و پابه‌ندبونه‌كانی سه‌ر هه‌رێم له‌خۆده‌گرن، ئه‌و لێكتێگه‌یشتنانه‌ش ده‌بنه بنه‌مایه‌ك بۆئه‌وه‌ی له‌ساڵانی داهاتودا و له‌كاتی په‌سه‌ندكردنی بودجه كێشه‌كان ئاڵۆز نەبن و دوباره نه‌بنه‌وه”.
ئەو ئەندامەی لیژنەی وزەی پەرلەمانی عێراق باسی لەوەشکردوە: “قوباد تاڵه‌بانی سه‌رۆكی شاندی هه‌رێم له‌دانوستانه‌كاندا به‌ڵێنیداوه كه هه‌رێمی كوردستان پابه‌ند ده‌بێت به‌رێكه‌وتنه‌كه‌ی له‌گه‌ڵ به‌غدا، رێگه‌ش به دیوانی چاودێری دارایی فیدڕاڵی ده‌درێت ئاماده‌یی هه‌بێت له‌داموده‌زگاكانی هه‌رێم و چاودێریکردنی ده‌روازه‌كاندا”.
