روسیا و ئەمریکا لەبارەی بەگەڕخستنەوەی رێککەوتنی ئەتۆمی لێدوانی پێچەوانە دەدەن

SNN

لە کاتێکدا ئەمریکا بە دووری دەزانێت دانوستانەکانی بەگەڕخستنەوەی رێککەوتنی ئەتۆمی 2015 بگەنە ئەنجام، جێگری وەزیری دەرەوەی روسیا دەڵێت: “ئەگەری گەیشتن بە رێککەوتن نزیکە”.

ئانتۆنی بلینکن، وەزیری دەرەوەی ئەمریکا رایگەیاند: “لەئەگەری بەردەوامبوونی ئێران لەسەر هەڵپەساردنی پابەندبوونەکانی بە رێککەوتنی ئەتۆمی، ئەستەمە واشنتۆن بگەڕێتەوە بۆ ئەو رێککەوتنە”.

وتیشی: “هێشتا لە دانوستانەکانی ڤییەنادا ناکۆکی زۆر جدی ماون کە پێویستە گفتوگۆی زیاتریان لەبارەوە بکرێت”.

لەبەرامبەردا سێرگی ریباکۆف جێگری وەزیری دەرەوەی روسیا رایگەیاندوە: ” بەئەگەرێکی زۆر دانوستانەکانی ڤییەنا دەگەنە ئەنجام و رێککەوتنی ئەتۆمی بەگەڕدەخرێتەوە”.

ئەمەش لە کاتێکدایە پێشتر بەرپرسانی ئێرانی باسیان لەوەکردبوو، “لەسەر هێڵە گشتییەکانی بەگەڕخستنەوەی رێککەوتنی ئەتۆمی گەیشتوونەتە لێکتێگەیشتن و تەنها واژۆکردنی رێککەوتنی کۆتایی ماوە”.

دوای ئەوەی لە ساڵی 2018 دا ئەمریکا لە رێککەوتنی ئەتۆمی کشایەوە و سزاکانی بەسەر ئێراندا سەپاندەوە، وەک کاردانەوەیەک تاران پابەندبوونەکانی بەو رێککەوتنە هەڵپەسارد.

ماوەی زیاتر لە دوو مانگە بەمەبەستی بەگەڕخستنەوەی رێککەوتنی ئەتۆمی دانوستانی چڕ لە ڤییەنا بەڕێوەدەچێت.