وەزارەتی کارەبا: کاتژمێرەکانی پێدانی کارەبا زیاد دەکەن

SNN

وتەبێژی وەزارەتی کارەبا رایگەیاند، “هەفتەی داهاتوو کاژێرەکانی پێدانی کارەبای نیشتمانی دەگاتەوە سەرووی 14 کاتژمێر لە رۆژێکدا”.

ئومێد ئەحمەد، وتەبێژی وەزارەتی کارەبا لە لێدوانێکدا رایگەیاندوە: “لە دوای 15ی ئەم مانگەوە بەهۆی کێشەیەکی تەکنیکییەوە 400 مێگاوات کارەبا کەمی کردووە، هەروەها بەرزبوونەوەی پلەی گەرمیش یەکێکی دیکەیە لە هۆکارەکانی کەمبوونەوەی کاژێری کارەبا”.

وتیشی: لە دوای ئەو کێشە تەکنیکییە کارەبا لە رۆژانە 20 کاتژمێرەوە بۆ نزیکەی 16 کاژێر دابەزیوە، هەروەها ئێستا لە هەولێر و سلێمانی نزیکەی 13 بۆ 14 کاتژمێر کارەبا هەیە، بەڵام وەزارەتی کارەبا “هەموو هەوڵەکانی خستووەتەگەڕ کە بە زووترین کات ئەو یەکانە چارەسەر بکەن.”

روونیشیکردەوە: “لە هەفتەی داهاتووەوە بەشێک یان هەموو ئەو یەکانەی کارەبا چارەسەر دەکرێن، بەو شێوەیەش کاتژمێرەکانی پێدانی کارەبا دووبارە باش دەبێت و دەگاتە 14 کاتژمێر”.