هۆكاری بەشدارینەكردنی وەزیری دارایی لە كۆبوونەوەی ئەنجومەنی وەزیران لەلایەن SNNوە ئاشكرا دەكات
SNN-عەلی حەمە سەعید
دوای ئەوەی لە دواین كۆبوونەوەی پەرلەمانی كوردستان كە ماوەی 18 كاتژمێری خایاند زۆرترین رەخنە و پرسیار ئاراستەی وەزیری دارایی و ئابوری حكومەتی هەرێم كرا، بەڵام وەزیری دارایی ئەمەی بە پلانێكی چەند فراکسەۆنێکی پەرلەمانی زانیوە بۆ ئەوەی بیخەنە ئەو مەوقیفەوە كە هیچ وەڵامێكی پێنەبێت، ئەمڕۆش بە بیانووی سستی لە دابەشكردنی مووچە بەشداری كۆبوونەوەی ئەنجومەنی وەزیرانی نەكردووە.
بە گوێرەی ئەو زانیارییانەی كە لەبەرپرسێكی باڵای حكومەتی هەرێم بە SNNدراون، ( ئاوات شێخ جەناب) كە لە پشكی بزوتنەوەی گۆڕان ئەو پۆستەی وەرگرتووە زۆر نیگەرانبووە لە بەشداریكردنی لە كۆبوونەوەی پەرلەمانی كوردستان، چونكە پێشتر وا لەو وەزیرە گەیەندراوە كە تەنها دیتە پەرلەمان ڕوونكردنەوەی خۆی دەداتە پەرلەمانتاران و هیچ پرسیار و ڕەخنەیەكی ئاراستە ناكرێت، بەڵام كاتێك زانیویەتی بەرنامەی دانیشتنی پەرلەمان بەو جۆرە نییە كە ئەو خۆی بۆ ئامادە كردووە كەوتووەتە مەوقیفێكی ئیحراجییەوە.
ئاماژەی بەوەشكرد، ئەگەر لە كۆبوونەوەكەی پەرلەمان تێبینیتان كردبێت (ئاوات شێخ جەناب) زۆرترین پرسیار و رەخنەی ئاراستە كرا، بەڵام یەكێك بوو لە وەزیرانەی كە كەمترین قسەی كردو كەمترین وەڵامی پەرلەمانتارانی دایەوە ئەو وەڵامانەشی كە پێی بوو لە ئاست متمانەی پەرلەمانتاران نەبوو بە پەرلەمانتارانی بزوتنەوەی گۆڕانیشەوە هاوكات ( ئومێد سەباح) كە لە پشكی پارتی سەرۆكی دیوانی ئەنجومەنی وەزیرانە زۆربەی ئەو پرسیارانەی ئاراستەی وەزیری دارایی كراون ئەو وەڵامی داونەتەوە، بۆیە وەزیری دارایی ئەمەی بە سینارۆیەكی چەند فراکسيۆنێکی پەرلەمانی زانیوە لە دژی ئەو.
ئەو بەرپرسەی حكومەتی هەرێم ئەوەشی ڕوونكردەوە، ئەمڕۆ لە كۆبوونەوەی ئەنجومەنی وەزیران بە بیانووی ئەوەی كە گوایە پارەی پێویست ناگەڕێتەوە بۆ وەزارەتی دارایی و ناتوانن بە خێرایی مووچە دابەشبكەن، بەشداری لە كۆبوونەوەی ئەمڕۆی ئەنجومەنی وەزیراندا نەكردووە، بەڵام لە ڕاستیدا بەشدارینەكردنی ئەمرۆی لە كۆبوونەوەی حكومەت بۆ ئەوە بووە كە نیگەرانی خۆی دەرببڕیت لە شێوازی بەشداریكردنی لە كۆبوونەوەی پەرلەمان و ئەو ڕەخنە و پرسیارانەی ئارستەی كران و وەڵامی پێویستی پێنەبوو.
