لەبارەی دەستگیركردنی گەنجێك لەلایەن پاسدارانی ئێرانەوە لە بیارە روونكردنەوە دەدرێت

SNN-عەلی حەمە سەعید

بەڕێوەبەری ناحییەی بیارەی ئاماژەبەوە دەكات: “ئەو گەنجەی كە لەلایەن هێزەكانی پاسدارانی ئیرانەوە دەستگیركراوە و لێپێچینەوەی لەگەڵدا كراوە، سنوری نێوان هەرێمی كوردستان و ئێرانی بەزاندووە و دوای بەدواداچوونەکانمان ئازادکراوە”.

حەمید بارام بەڕێوەبەری ناحیەی بیارە بە SNNی راگەیاند: “بەو پێیەی كە پاراستنی سنورەكان لە نێوان عێراق و هەر وڵاتێكی دیكە لە ئەستۆی هێزەكانی پاسەوانی سنوری عێراقدایە ئێمە لەگەڵ پاسەوانی سنوور قسەمان كردووە لەبارەی هۆكاری هاتنە خوارەوەی هێزەكانی پاسدارانی ئێران و دەستگیركردنی ئەو گەنجە كورد لە نزیك ناحییەی بیارە”.

ئاماژەی بەوەشكرد: “لەلایەن هێزەكانی پاسەوانی سنوری عێراقەوە ئەوەیان پێڕاگەیاندین كە ئەو گەنجەی لەلایەن پاسدارانی ئێرانەوە دەستگیركراوە سنووری خاكی ئێرانی بەزاندووە بۆیە هێزەكانی پاسدارانی ئێران لێپێچینەوەی یاساییان بەرامبەر گرتووەتە بەر و دەستگیریان كردووە، بەڵام هەر دوێنێ بە هەماهەنگی لەگەڵ پاسەوانی سنور گەنجەکە ئازادکراوە.”.

بەڕێوەبەری ناحییەی بیارە ئەوەشی روونكردەوە: “ئەو گەنجەی دەستگیركرابوو خەڵكی سنوری پارێزگای هەڵەبجە،  ئەمە یەكەم جارە حاڵەتی لەو شێوەیە لەلایەن هێزەكانی پاسدارانی ئێرانەوە رووبدات “.