تاڵیبان دەروازە سنوورییەکانی ئەفغانستانی کۆنتڕۆڵکردووە

SNN

بزووتنەوەی تاڵیبان ئەمڕۆ کۆنتڕۆڵکردنی ناوچەیەکی ستراتیکی لە رۆژئاوای ئەفغانستان راگەیاند کە دەروازەیەکی سنووری گرنگ لەگەڵ ئێرانی لەسەرە، بەوەش ناوچەکانی ژێر دەستیان هێندەی دیکە فراوان دەبێت.

ئەو ناوچە نوێیەی تاڵیبان کۆنتڕۆڵیکردووە دەروازەی سنووری ئیسلام قەڵای لەسەرە، دەکەوێتە سنووری پارێزگای هەرات-ەوە، لەدوای هێرشەکەیان، هێزە ئەمنییەکانی ئەفغانستان و بەرپرسانی دەروازەکە هەڵاتوون.

بەرپرسێکی ئەمنی بە ئاژانسی رۆیتەرزی وتووە، تاڵیبان بەبێ شەڕ پێنج شاری لە هەرات کۆنتڕۆڵکردووە.

بەرپرسانی ئەمنی ئەفغانستان دەڵێن تاڵیبان لە ماوەیەکی کورتدا ناوچەیەکی فراوانی لە ئەفغانستان کەوتووەتەدەست و پێشڕەوی زۆری کردووە.

لە ماوەی چەند رۆژی رابردووشدا ناوچە سنوورییەکانی ئەفغانستان لەگەڵ هەریەک لە وڵاتانی تاجیکستان، تورکمەنستان، چین و پاکستانی کۆنتڕۆڵکردووە.

لەکاتی کۆنتڕۆڵکردنی سنووری تاجیکستاندا زیاتر لە هەزار سەربازی ئەفغانی بەرەو تاجیکستان هەڵاتن، هەزارانی دیکەش لەلایەن تاڵیبانەوە بەدیلگیران لە باکووری پارێزگای بەدەخشان کە هاوسنوورە لەگەل چین و پاکستان.