ژمارەی قوربانییەکانی لافاوەکەی ئەڵمانیا بەرزبووەوە
لافاوەکەی ئەڵمانیا، وێنە: AP
SNN
ژمارەی ئەو کەسانەی لە رۆژئاوای ئەڵمانیا بەهۆی لافاوەوە گیانیان لەدەستدا تا سەرلەبەیانی ئەمڕۆ بۆ 81 کەس بەرزبووەوە، زیاتر لە هەزار کەسیش بێسەروشوێنن.
میدیای فەرمی ئەڵمانیا رایگەیاندووە ئەمە گەورەترین مردنی بەکۆمەڵی ئەڵمانییەکانە کە لە چەندین ساڵدا روویدابێت.
هاوکات هەزار و 300 کەس لە ناوچەی ئاهروەیڵەر لە باشووریی کۆڵن بێسەروشوێنن، هێڵەکانی موبایل و ئینتەرنێت لە چەندین ناوچەی وڵاتەکە لەکارکەوتووە و هاووڵاتیان چارەنووسی کەسانی نزیک لە خۆیان نازانن.
هەر بەهۆی لافاوەکەوە ژمارەیەک هێڵی شەمەندەفەر لەکارکەوتوون و هاتووچۆی کەشتی لە رووباری راین وەستاوە.
زیانێکی زۆر بەر هاووڵاتیان کەوتووە و بەدەیان خانوو رووخاون یان مەترسی رووخانیان لەسەرە.
ئەم لافاوە بەلجیکا و هۆڵەندای دراوسێی ئەڵمانیاشی گرتووەتەوە و گیانلەدەستدان و زیانی ماددی لەو دوو وڵاتەش تۆمارکراوە.
