سبەی پۆستی جێگری پارێزگاری هەڵەبجە دەدرێتە بزوتنەوەی گۆڕان

SNN-عەلی حەمە سەعید

وابڕیارە سبەی یەكشەممە لە ڕێوڕەسمێكی تایبەتدا پۆستی جێگری پارێزگاری هەڵەبجە بۆ كاروباری كارگێڕی بدرێتە بزوتنەوەی گۆڕان و كاندیدەكەیان دەستبەكار ببێت، ئەوەش دوای ئەوەی ماوەی چوار ساڵە ئەو پۆستە بە بەتاڵی ماوەتەوە.

شاهێن حەمە ڕەزا، كاندیدی بزوتنەوەی گۆڕان بۆ وەرگرتنی پۆستی جێگری پارێزگاری هەڵەبجە بە SNNی ڕاگەیاند: لەلایەن وەزارەتی ناوخۆوە لە رێککەوتی 2020/8/3 فەرمانی دەستبەكار بوونم وەك جێگری پارێزگاری هەڵەبجە بۆ كاروباری كارگێڕی بۆ دەرچووە و سبەی یەكشەممە بەفەرمی پەیوەندی بە كارەكەمەوە دەكەم ، پارێزگاری هەڵەبج دوو جێگری دەبێت یەكێكیان بۆ كاروباری هونەرییە و ئەویدیكەشیان بۆ كاروباری كارگێڕییە.

ئاماژەی بەوەشكرد: “پێدانی ئەو پۆستە بەمن لەسەر بنەمای ئەو رێككەوتنەیە كە لە نێوان بزوتنەوەی گۆڕان و یەكێتی نشتیمانی كوردستان واژۆی لەسەر كراوە بۆ دابەشكردنی پۆستە ئیدارییەكانی سنووری پارێزگای هەڵەبجە و سلێمانی، بۆیە بەهۆی ئەوەی لە ئێستادا پۆستی پارێزگاری سلێمانی لەلایەن بزوتنەوەی گۆڕانەوە بەڕێوە دەبرێت پۆستی پارێزگاری هەڵەبجەش لە لایەن یەكێتییەوە بەڕێوەدەبرێت”.

ئەو كاندیدەی بزوتنەوەی گۆڕان ئەوەشی خستەڕوو: “هەر بە گوێرەی ڕێككەوتنەكەی نێوان ئێمە و یەكێتی نشتیمانی كوردستان دەبێت گۆڕانكاری لە پۆستی قایمقامی قەزای ناوەندی هەڵەبجەش بكرێت، چونكە ئەو پۆستەش بەركەوتەی سیاسی ئێمەیە بۆیە هیوادارین بەهۆی ئەو لێكنزیكبوونەوە و هاوپەیمانییەی لەنێوان یەكێتی و گۆڕان هاتووەتە ئاراوە بتوانین بە باشی كارەكانمان ئەنجامبدەین”.