بڕیاری دەستبەسەرداگرتنی ئۆتۆمبێلی بێسەرەتا ئەو ئۆتۆمبێلانە ناگرێتەوە کە کۆدیان بۆ کراوە
SNN-عەلی حەمە سەعید
بەرپرسێكی هاتووچۆ ئاماژە بەوەدەكات: “تا ئێستا لەلایەن وەزارەتی ناوخۆوە ئاگادار نەكراوینەتەوە كە ئەو ئۆتۆمبێلانەی كۆدی مروریان بۆ كراوە دەستیان بەسەردا بگرین”.
عەمید حەسەن عەبدوڵا، بەڕێوەبەری هاتووچۆی هەڵەبجە بە SNNی ڕاگەیاند: ئەو هەڵمەتەی كە ماوەی چەند رۆژێكە دەستمانپێكردووە بۆ دەستبەسەرداگرتنی ئۆتۆمبێلی بێسەرەتا و جامڕەش، لەلایەن مەفەرەزەكانمانەوە كارەكانیان بە باشی ئەنجامدەدەن، لەلایەن بەڕێوەبەرایەتی گشتی هاتووچۆی هەرێمەوە بەڕێوەبەری هاتووچۆی پارێزگاكانی هەرێم ئاگاداركراوینەتەوە كە ئەو ئۆتۆمبێلانەی كۆدی مروریان بۆ كراوە دەستیانبەسەردا نەگیرێت.
ئاماژەی بەوەشكرد: “دواین نوسراو كە لەلایەن وەزارەتی ناوخۆوە لەبارەی ئەو ئۆتۆمبێلانەوە دەرچووە ئەوەیە کە نابێت دەستیانبەسەردا بگیرێت و لەدوای ئەو نوسراوەش هیچ نوسراوێكی دیكە نەهاتووە بۆیە ئێمە ناتوانین دەستبەسەر ئەو ئۆتۆمبیلانەدا بگرین كە كۆدی مروریان بۆ كراوە بەڵام بەدڵنیاییەوە ئەو كۆدەش بەو مانایە نایەت كە خاوەنی ئەو جۆرە ئۆتۆمبێلانە ئازادن لە لە بەركارهێنانی ئۆتۆمبێلەكانیان بەڵكوو دەبێت نەیانهێننە سەرشەقامەكان”.
بەڕێوەبەری هاتووچۆی پارێزگای هەڵەبجە ئەوەشی خستەڕوو: ” ئەم جۆرە ئۆتۆمبێلانە تەنها لە هەڵەبجە و سلێمانیدا بوونیان نییە، بەڵكوو لە هەموو پارێزگاكانی دیكەی هەرێم بوونیان هەیە و ژمارەیان زۆر زیاترن لە هەڵەبجە و سلێمانی، بۆیە ناكرێت لە سلێمانی دەستیان بەسەردا بگرێت و لە هەولێر و دهۆك ئازاد بن، بەڵکو دەبێت لەلايەن وەزارەتی ناوخۆوە بڕیارێكی سەرتاسەرییان بۆ دەربكرێت”.
