” ئەستەمە لەکاتی خۆیدا بتوانرێت هەڵبژاردن ئەنجام بدرێت”

SNN

حزبی پێشکەوتن بە سەرۆکایەتی محەمەد حەلبوسی سەرۆکی پەرلەمانی عێراق ئەمڕۆ یەکشەمە رایگەیاند: کە کەشێکی سیاسی لە بار لە عێراقدا و لەکاتی ئێستادا بوونی نییە بۆ ئەنجامدانی هەڵبژاردنەکانی عێراق، بۆیە لەو بروایەدا نین لە رێکەوتی 10ی تشرینی یەکەمی ئەمساڵ ئەنجام بدرێت.

رەعد دهەلکی، یەکێک لە سەرکردەکانی حزبی پێشکەوتن و هاوکات جێگری محەمەد حەلبوسی سەرۆکی حزب رایگەیاند: تا ئێستا عێراق لە کەشوهەوایەکی سیاسی گونجاودا نییە بۆ ئەنجامدانی هەڵبژاردن، دڵنیاشم کە هەڵبژاردنێکی پاک و بێگەرد لە عێراقدا ناکرێت تا چەک بە دەستی کەسانی لادەر و نایاساییەوە بێت، ئێمە چۆن دەتوانین هەڵبژاردنێکی پێشوەخت بکەین کاتێک دەبینین ناوچەی سەوزی بەغدا کە یەکێکە لە ناوچە گرنگ و پڕ ئەمنێتییەکانی عێراق و ژمارەیەکی زۆر باڵیۆزخانەی تێدایە بەڵام هێشتا رۆژانە لەژێر هێرشی مووشەکیدایە.

جێگری حزبی پێشکەوتن، ئاماژەی بەوەکرد، کە دەوڵەت دەسەڵاتی تەواوی بەسەر دەوڵەتدا نییە، بۆیە چاوەڕوانی هەڵبژاردنی بێگەرد ناکرێت، و گۆڕانکاری و ساختەکاری زۆری تێدا ئەنجام دەدرێت.