حکومەتی هەرێم چوار ملیار دیناری بۆ بەرەنگاربوونەوەی وشکەساڵی و کەمئاوی تەرخانکرد

SNN

حکومەتی هەرێمی کوردستان چوار ملیار دینار بۆ بەرەنگاربوونەوەی وشکەساڵی و چارەسەرکردنی کێشەی ئاوی خواردنەوە تەرخاندەکات.

حکومەتی هەرێمی کوردستان لە ماڵپەڕی فەرمی خۆی رایگەیاند، چوار ملیار دینار بۆ رووبەڕووبوونەوەی وشکەساڵی و کێشەی ئاوی ماڵان تەرخاندەکەن، کە دوو ملیار و 500 ملیۆن دیناریان بەسەر پارێزگاکانی هەولێر، سلێمانی و دهۆک دابەشدەکرێت.

ئەو دوو ملیار و 500 ملیۆنەی کە بۆ پارێزگاکان خەرجکراوە، 925 ملیۆن دینار بۆ پارێزگای هەولێر، 575 ملیۆن دینار بۆ پارێزگای دهۆک و یەک ملیار بۆ پارێزگاکانی سلێمانی و هەڵەبجە و ئیدارەی گەرمیان راپەڕین تەرخاندەکرێت.

بەپێی راگەیێندراوەکە، ملیارێک و 500 ملیۆن دینار “بە مەبەستی خێرا بەرەنگاربوونەوەی کێشەی کەمئاوی لە سنووری پارێزگای هەولێر” خەرجدەکات.

بە هۆی کەمبارانیی و بەرزبوونەوەی پلەکانی گەرما کێشەی کەمئاوی و وشکەساڵی لە هەرێمی کوردستان سەریهەڵداوە لە دوو رۆژی رابردوودا لە هەولێر لە دژی دابەشنەکردنی ئاو دانیشتوانی چەند گەڕەکێک خۆپیشاندانیان ئەنجامدا.