یەکێتی ئەوروپا داوا لە تالیبان دەکات بگەڕێتەوە سەر مێزی دانوستان

SNN

بەرپرسی پەیوەندییەکانی دەرەوە و سیاسەتی ئەمنی یەکێتی ئەوروپا وێڕای ئیدانەکردنی بەردەوامی هێرشەکانی تالیبان، داوای لەو بزوتنەوەیە کرد بگەڕێتەوە بۆ سەر مێزی دانوستان.

جۆزف بورێل، بەرپرسی پەیوەندییەکانی دەرەوە و سیاسەتی ئەمنی یەکێتی ئەوروپا رایگەیاند: بەردەوامی پەلامارەکانی تاڵیبان، بەتەواوی پێشێلی بەڵێنەکانی قۆناغی ئاشتی دۆحە و هەوڵەکانی بە دانوستان چارەسەر کردنی پێکدادانەکانە، بۆیە داوای کردوە ئەو بزوتنەوەیە بگەڕێتەوە بۆ سەر مێزی دانوستان و ئاگربەستێکی هەمیشەیی رابگەیەنرێت.

بە بیریشی هێناوەتەوە، کە یەکێتی ئەورووپا ئیدانەی پێشێلکارییەکانی مافی مرۆڤ لە ئەفغانستان دەکات و جەختیشی کردوەتەوە: “هانی چارەسەرکردنی جیاوازییە سیاسییەکانی ئەفغانستان، زیادکردنی رۆڵی سەرجەم لایەنەکان و دروستکردنی رەهەندێکی هاوبەش بۆ دروستکردنی پەیوەندی لەگەڵ تاڵیبان دەدەین”.

ئەو بەرپرسەی یەکێتی ئەوروپا باسی لەوەشکرد: ئامانجیانە پشتیوانییەکانیان بۆ گەلی ئەفغان درێژە پێبدەن بەو مەرجەی کە چارەسەرێکی گشتگیر و ئاشتییانە بۆ پرسی ئەو وڵاتە بدۆزرێتەوە و تیایدا رێز لە سەرجەم مافەکانی ژنان، گەنجان و کەمینەکان بگیردرێت.

لەدوای دەستپێکردنی کشانەوەی ئەمریکا و هاوپەیمانان لە ئەفغانستان، بزوتنەوەی تالیبان هێرشەکانی چڕکردوەتەوە و تائێستا نزیکەی نیوەی ولایەتەکانی ئەو وڵاتەی کۆنتڕۆڵ کردووە.