یەحیا رەسوڵ: فڕۆکە و چەکی زیاتر لە فەڕەنسا دەکڕین

SNN

وتەبێژی فەرماندەی گشتی هێزە چەکدارەکانی عێراق رایگەیاند: “عێراق بەنیازە گرێبەستی نوێ لەگەڵ فەڕەنسا واژوو بکات بۆ کڕینی چەک بۆ هێزە ئەمنییەکان و فڕۆکەی هێزی ئاسمانی وڵاتەکە”.

یەحیا رەسوڵ لە راگەیەندراوێکیدا کە ئەمڕۆ بڵاویکردووەتەوە دەڵێت: “فەڕەنسا وڵاتێکی زلهێزی بەشدارە لە شەڕی دژ بە تیرۆر، لەنێو هاوپەیمانی نێودەوڵەتیدا رۆڵی گرنگی بینیووە بەتایبەت بە هێرشە ئاسمانییەکانی دژ بە داعش و ئاڵوگۆڕکردنی زانیاری هەواڵگری لە ئۆپراسیۆنەکانی ئازادکردنی ناوچەکانی عێراق لەژێر دەستی داعش”.

ناوبراو باسی لە هەماهەنگی سەربازی نێوان فەڕەنسا و عێراق و راهێنان و پڕچەککردنی سوپای عێراق لەلایەن ئەو وڵاتەوە کرد و خواستی عێراقیشی بۆ کڕینی چەک و فڕۆکەی سەربازی نیشاندا.