ئێران: بەهۆی نەگەڕاندنەوەی قەرزەکانەوە هەناردەی غازمان بۆ عێراق کەمکردوەتەوە

SNN

بەرپرسێکی کۆمپانیای نیشتمانی نەوت و غازی ئێران دەڵێت: بەهۆی نەگەڕاندنەوەی پارەی کارەبا و غازەوە لە لایەن حکومەتی بەغداوە، هەناردەی غازیان بۆ عێراق کەمکردوەتەوە.

وەزارەتی کارەبای عێراق رایگەیاندبوو: ئێران ئاستی هەناردەی غازی لە 49 ملیۆن مەتری سێجا لە رۆژێکدا بۆ هەشت ملیۆن مەتری سێجا کەمکردوەتەوە، بەو هۆیەشەوە ئاستی بە بڕی پێنج هەزار و 500 مێگاوات لە ئاستی بەرهەمهێنانی کارەبای عێراق دابەزیوە.

لەوبارەوە مێهران ئەمیرئەمینی، جێگیر بەڕێوەبەری کۆمپانیای نیشتمانیی نەوت و غازی ئێران بۆ اکروباری بەبازاڕکردنی نێودەوڵەتی ئەو بابەتە پشتڕاست کردوەتەوە و هۆکارەکەی بۆ ئەوە گەڕاندوەتەوە، کە لایەنی عێراقی پابەند نەبووە بە گەڕاندنەوەی قەرزەکانی.

بەرپرسە ئێرانیەکە راشیگەیاندوە: گرێبەستەکانی هەناردەکردن، دوو لایەنەن و دەبێت هەردوولا پابەندبن بە بڕگە و ماددەکانیەوە، بۆیە نابێت لایەنی عێراقی گلەیی بکات، چونکە لە کاتی خۆیدا پارەی غاز و کارەبایان نەگەڕاندوەتەوە و بەم پێیەش لایەنی ئێرانی هیچ کارێکی نایاسایی نەکردووە.

عێراق بە بڕی زیاتر لە پێنج ملیار دۆلار پارەی غاز و کارەبای ئێران قەرزارە و وەک بەرپرسانی بەغدا ئاماژەی بۆ دەکەن، بە هۆی گەمارۆکانی واشنتۆن لەسەر تاران ناتوانن پارەکە بۆ ئێران بگەڕێننەوە.