بەسەرپەرشتی بافڵ تاڵەبانی ئێوارەی ئەمڕۆ مەكتەبی سیاسی یەكێتی كۆدەبێتەوە

SNN-عەلی حەمەسەعید
بەمەبەستی زیاتر ئامادەكاری بۆ بەشداریكردن لە هەڵبژاردنەكانی پەرلەمانی عێراق و خۆئامادەكردن بۆ چۆنییەتی بەڕێوەچوونی بانگەشەكانی هەڵبژاردن بۆ لیستی هاوپەیمانی و هاوكات گفتوگۆكردن لەبارەی چەند بابەتێكی ناوخۆیی، ئێوارەی ئەمڕۆ مەكتەبی سیاسی یەكێتی لە شاری سلێمانی بە سەرپەرشتی بافڵ تاڵەبانی هاوسەرۆکی كۆدەبێتەوە.

بەگوێرەی زانیارییەكانی SNN وابڕیارە كە ئێوارەی ئەمڕۆ بەسەرپەرشتی ( بافڵ تاڵەبانی) مەكتەبی سیاسی یەكێتی نشتیمانی كوردستان لە شاری سلێمانی كۆبوونەوەی ئاسایی خۆی ئەنجام بدات، لە كۆبوونەوەكەشدا چەند تەورێك دەخرێنە بەرباس و گفتوگۆ، بەتایبەت بابەتی ئامادەكارییەكان بۆ هەڵبژادنەكانی پەرلەمانی عێراق و دەستپێكردنی بانگەشەی هەڵبژاردنی لیستی هاوپەیمانی.

ئاماژەی بەوەشكرد، هەر لەو كۆبوونەوەیەدا وابڕیارە كە باس لە گۆڕانكارییەكانی ئەم دواییەی ناو یەكێتی بكرێت هاوكات باس لە قۆناغی داهاتووی شێوازی كاركردنی مەڵبەند و كۆمیتە و ئۆرگانەكانی دیكەی یەكێتی بكرێت بەجۆرێك هەموو ئۆرگانەكان تواناكانیان یەك بخەن بۆ سەرخستنی كاندیدەكانی لیستی هاوپەیمانی كوردستان نێوان یەكێتی نشتیمانی كوردستان و بزوتنەوەی گۆڕان.

هەر لە زانیارییەكانی SNN ئەوەش هاتووە كە وابڕیارە ڕۆژی پێنج شەممە 9/9/2021 لیستی هاوپەیمانی كوردستانی نێوان یەكێتی نشتیمانی كوردستان و بزوتنەوەی گۆڕان بەفەرمی دەستبكەن بەدەستكردن بە بانگەشەی هەڵبژاردن لە سەرجەم ئەو شاروشارۆچكانەی كە كاندیدی لیستی هاوپەیمانی تیادان، بۆ یە بەشێكی كۆبوونەوەكەی مەكتەبی سیاسی یەكێتیش بۆ ئەو بابەتە تەرخانكراوە.