پیاوێک لەکاتی رزگارکردنی ژیانی هاوسەرەکەی خنکا

SNN

ئەمڕۆ هەینی لە رووباری گەلی عەلی بەگ، پیاوێك هاوسەرەكەی لە خنكان رزگار کرد بەڵام خۆی خنکا.

بەرێوەبەرایەتی بەرگری شارستانی سۆران لە راگەیەندراوێکدا بڵاویکردەوە : كاتژمێر 3 و 30 خولەکی دوای نیوەڕۆ ئاگاداری ژووری بزوێنی بەرێوەبەرایەتییان كرایەوە بەبوونی رووداوێكی خنكان لە رووباری گەلی علی بەگ به ناوی هەرێم محەمەد مەولود، كە تەمەنی 38 ساڵە و كاسبكاربووە، رووداوەکە لەکاتێکدا بووە کە هاوسەرەکەی لە خنکان رزگارکردووە.

لەبارەی ئەو هاووڵاتییەی کە گیانی لەدەستداوە بەڕێوەبەرایەتیەکە دەڵێت: هەرێم محەمەد، دانیشتوی گەڕەکی قەڵای نوێی هەولێرە و لەبنەڕەتدا خەڵکی پارێزگای کەرکوکه، لەگەڵ خێزانەکەی بەمەبەستی گەشت و سەیران روویان لە ناوچەی گەلی عەلی بەگ كردووە.

بەوتەی هاوسەرەکەی کە ناوی (دلڤین کەمال ڕەسول)ە و قسەی بۆ پۆلیس كردووە، سەرەتا (دلڤین) نزیک بووەتەوە لە کەناری ڕووبارەکەو کەوتووەتە ناو ڕووبارەکەوە لەلایەن هاوسەرەكەی (هەرێم محەمەد مەولود) رزگار کراوە، بەڵام ناتوانێت گیانی خۆی ڕزگار بکات و لەنێو ڕووبارەکە دەخنکێت.

تەرمەكەی هەرێم، لەلایەن هاوڵاتیانی نزیک ڕووداوەکە لە ڕووبار دەردەهێنرێتەوە و ڕەوانەی پزیشکی دادی سۆران دەکرێت.

رووداوەکانی خنکان لە دەریاچە و رووبارەکانی هەرێمی کوردستان بەردەوامییان هەیە و بەگوێرەی ئامارەکانیش، لە سەرەتای ئەمساڵەوە تاوەکو ئێستا تەنیا لە سنووری سۆران 12 هاووڵاتی خنكاون.