بەشدار حەسەن: ئاسایشی هەولێر بەزۆر مانگرتن بە بەشێک چالاكوانانی بادینان دەشكێنێت
وێنەی ژمارەیەک لە زیندانیانی بادینان
SNN-عەلی حەمە سەعید
بە وتەی سەرۆكی تیمی پارێزەرانی دەستگیركراوان و چالاكوانانی بادینان، سبەی پرۆسەی دووەم دانیشتنی تایبەت دادگاییكردنی دووان لە دەستگیركراوان و چالاكوانانی بادینان بەڕێوە دەچێت و بەهۆی نەبوونی هیچ بەڵگەیەكی بەهێز ئومێدیان زۆرە بڕیاری ئازادكردنیان دەربچێت، هاوكات باس لەوەشدەکات، ئاسایشی هەولێر بەزۆر كۆتایی بە مانگرتنی بەشێک لە دەستگیرکراوانی بادینان هێناوە.
بەشدار حەسەن، سەرۆكی تیمی پارێزەرانی دەستگیركراوان و چالاكوانانی بادینان بە SNNی ڕاگەیاند: “سبەی چوار شەممە كاتژمێر 10ی پێش نیوەڕ لە دادگای هەولێر دووەم پرۆسەی دادگاییكردنی هەریەكە لە دەستگیركراوان (بەدەل بەرواری و ئومێد بەرۆشكی) بەڕێوە دەچێت و هیوای زۆرمان هەیە هەر سبەی دادوەر بڕیاری ئازادكردنیان بدات، چونكە ئەو بەڵگانەی لەسەریانە بەڵگەی زۆر لاوازن”.
ئاماژەی بەوەشكرد، پێشبینیش دەكەین كە بیانووی گۆڕینی سەرۆكی دادگا و دوو لە دادوەری دادگاكە بكرێتە هۆكارێك بۆ ئەوەی سبەی بڕیاری ئازادكردنی ئەو دوو دەستگیركراوە دەرنەچێت، بەڵام هیوامان زۆرە كە سبەی دۆسییەی ئەو دوو دەستگیركراوە بە ئازادكردنیان كۆتایی پێبێت.
سەرۆكی تیمی پارێزەرانی دەستگیركراوان و چالاكوانانی بادینان ئەوەشی خستەڕوو، دوای ئەوەی ماوەی چەند هەفتەیەكە سەرجەم دەستگیركراوانی بادینان كە ژمارەیان زیاد لە 80 دەستگیركراوە مانگرتنیان ڕاگەیاند بوو، بەڵام بەزەبری هێز و بە ناچاری ئاسایش ئەو مانگرتنەی بە بەشێک لەو دەستگیركراوانە شكاندووە، بەلام هێشتا ژمارەیەكیان بەردەوامن لە درێژەدان بە مانگرتنەكەیان باری تەندروستیشیان باش نییە.
