بافڵ تاڵەبانی: هاوپەیمانی کوردستان بە ئامانجی بەهێزکردنی پێگەی هەرێم دروستبووە

SNN

بافڵ تاڵەبانی، ھاوسەرۆکی یەکێتیی نیشتمانیی کوردستان لە دەباشان پێشوازیکرد لە دەیڤید ھانت، کونسوڵی گشتی بەریتانیا لەھەرێمی کوردستان.

لەدیدارێکدا كە ئەمین بابە شێخ و سۆران جەمال تاھیر، ئەندامانی مەکتەبی سیاسی ئامادەیبوون، گفتوگۆکرا لەبارەی دوایین پەرەسەندنە سیاسی، ئابووری، ئەمنییەكان و ھەڵبژاردنەکانی عێراق.

بافڵ تاڵەبانی بۆ کۆی ھاوکێشەکان بۆچوون و سیاسەتی نەگۆڕی یەکێتی خستەڕوو رایگەیاند، یەکێتی لەسەر بنەمای بەرژەوەندی نەتەوەیی و نیشتمانی بڕیار لەسەر پرسەكان دەدات و هەر هەنگاوێك لەخزمەت كوردستان و خەڵكە خۆشەویستەكەیدا بێت پشتیوانی لێدەكات.

لەدرێژەی دیدارەكەدا هاوسەرۆك جەختی لە یەكڕیزی و كۆدەنگی هێز و لایەنە سیاسییەكان كردەوە و ڕایگەیاند، هاوپەیمانی كوردستان لەنێوان ئێمە و بزووتنەوەی گۆڕان بەئامانجی بەهێزتركردنی پێگەی هەرێم و یەكڕیزی نیشتمانی دروستبووە. دەمانەوێت پێكەوە یەك گوتاری نیشتمانیمان هەبێت و بەرگری لە بەرژەوەندییە باڵاكانمان بكەین و بیانپارێزین. پێشوازی لە هەر هەوڵێكیش دەكەین كەبیەوێت لەو پێناوەدا كار بكات.

لەبارەی بەڕێوەچوونی ھەڵبژاردنی ئەنجوومەنی نوێنەرانی عێراق بافڵ تاڵەبانی جەختی لەبەڕێوەچوونی ھەڵبژاردنێکی پاک و بێگەرد کردەوە کە زامنی پاراستنی سەقامگیری سیاسی، ئابووری و ئەمنی بکات و رەنگدانەوەی خواستی ھەمووان بێت.