لە دنیادا نەبووە پەرلەمانتار گۆرانی بۆ سەرۆکی حکومەت بڵێت
SNN-عەلی حەمە سەعید
دوای ئەوەی پەرلەمانتارێكی فراكسیۆنی پارتی لە گۆرانییەكدا ستایشی سەرۆكی حكومەت دەكات، ئەمە رووبەڕووی ڕەخنەی زۆری هاووڵاتیان بوویەوە و پێیان وایە كاری پەرلەمانتار بەدواداچوونی بۆ كێشەو گرفتەكانی هاووڵاتیان نەك گۆرانی وتن و پیاهەڵدان بەسەر سەرۆكی حكومەت، پەرلەمانتارێكیش دەڵێت ئەو پەرلەمانتارانەی ڕەخنەگرتن لە حكومەتیان لا تاوانە و گۆرانی بەسەر سەرۆكی حكومەتدا دەڵێن لە دنیایەكی دیكە دەژین.
شنۆ ئەشقی، ئەندامی پەرلەمانی كوردستان لە فراكسیۆنی یەكێتی بە SNNی ڕاگەیاند: ئەوەی لەم خولەی پەرلەمان ڕوودەدات لە پەرلەمانی هیچ وڵاتێكی دیكەدا نەبینراوە و ڕووی نەداوە، چونكە كۆمەڵێك پەرلەمانتار جگە لەوەی چاوی خۆیان داخستووە لەسەر كەموكورتییەكانی پەرلەمان و كاریان هەر ئەوەیە بەسەر حكومەتدا هەڵدەن و ستایشی بكەن ناوێرن ڕەخنە لە كەموكورتییەكان بگرن لەكاتێكدا كاری پەرلەمانتاری ڕاستەقینە بەدواداچوونە بۆ كێشەو گرفتەكانی هاووڵاتیان.
ئاماژەی بەوەشكرد، ئەو پەرلەمانتارانەی كاریان بووەتە پیاهەڵدانی حكومەت و ئاگایان لە كێشەو گرفتەكانی هاووڵاتیان نییە، ڕێگەش نادەن كە پەرلەمانتارەكانی دیكە ڕەخنە لە حكومەت بگرن و قسە لەسەر كەموكورتییەكانی حكومەت بكەن بۆیە ئەو پەرلەمانتارانەی ڕەخنەگرتن لە حكومەتیان لا تاوانە و گۆرانی بەسەر سەرۆكی حكومەتدا دەڵێن لە دنیایەكی دیكە دەژین و ئاگاداری ژیان و گوزەرانی هاووڵاتیان نین.
ئەو پەرلەمانتارەی فراكسیۆنی یەكێتی ئەوەشی خستەڕوو، دەبێت هاووڵاتیان ئەم هەڵسوكەوتانەی ئەو پەرلەمانتارانەیان لەبەرچاو بێت كە ئەوان بۆ ئەوە دەنگیان پێداون كیشەو گرفتەكانیان بۆ چارەسەر بكەن، بەڵام ئێستە دەبینین كاریان بووەتە ئەوەی كلیپ و گۆرانی بەسەر حكومەت و ستایشی سەرۆكی حكومەت دەربكەن كە ئەمە ئەو پەڕی لادانە لە كاری راستەقینەی پەرلەمانتاری.
