غازی كەركوكی بۆ كەمال كەركوكی: حزبەكەی تۆ كێشە بۆ كەركوك دروستدەكات
SNN-عەلی حەمە سەعید
لەبەرامبەر ئەو تۆمەتانەی كە كەمال كەركوكی ئەندامی مەكتەبی سیاسی ئاراستەی یەكێتیی نشتیمانیی كوردستانی كردووە گوایە یەكێتی لە كەركوك شكستی هێناوە و ئاژەوە دەنێتەوە، ئەندامێكی سەركردایەتی یەكێتی ئاماژە بەوە دەكات یەكێتی سەركەوتنی گەورەی بەدەست هێناوە بەلام ئەوە پارتی و بنەماڵەی بارزانین هەمیشە كێشە بۆ كەركوك و كەركوكییەكان دروستدەكەن و پاشان بەرەو هەولێر ڕادەكەن.
غازی كەركوكی ئەندامی سەركردایەتی یەكێتی نشتیمانی كوردستان بە SNNی ڕاگەیاند: لای هەموو كوردانی كەركوك و نەتەوەكانی دیكەش ئەوە ڕوونبووەتەوە كە پارتی و بنەماڵەی بارزانی ناهێڵن خەڵكی كەركوك بە ئارامی ژیان بگوزەرێنن چونكە بەرنامەی ئەوان بە جۆریكە یان دەبێت خەڵكی كەركوك هەمووی ببێتە كۆیلەی پارتی و بارزانی یان دەبێت بیانوویەك بدۆزنەوە بۆ شێواندنی ئارامی و پێكەوە ژیانی نەتەوەكانی كەركوك چونكە ئەگەر ئەم هەڵبژاردنەش نەبوایە ئەوا پارتی هەر دەبوو كێشەیەكی دیكە بۆ كەركوك دروست بكات.
ئاماژەی بەوەشكرد: ئەوەی كەمال بەناو كەركوكی بانگەشەی بۆدەكات لە بێئاگایی ئەوەوە سەرچاوەی گرتووە چونكە ئەوەی ئەو دەیڵێت زانیاری خۆی نیە بەڵكوو بۆیان نوسیوە و ئەویش دەیخوێنێتەوە، بێئاگا لەوەی كە یەكێتی سەرەڕای ئەو هەموو پیلانگێڕییەی بەرامبەری ئەنجامدرا بەتەنها سەركەوتنێكی گەورەی بەدەستهێنا.
ئەو ئەندامەی سەركردایەتی یەكێتی ئەوەشی خستەڕوو: ئەوەی كە دەڵێت یەكێتی تەقەی كردووە و ئاژاوەی ناوەتەوە، هەموو خەڵك باش ئەو ڕاستییە دەزانن كە هەمیشە یەكێتی بە ئاشكرا تەقەی لە دوژمن كردووە، نەهاتووە وەك پارتی لە پشتەوە خەنجەر بوەشێنێت، بۆیە ئەم دۆخەی ئێستا لەكەركوك دروست بووە بەهۆی ئەوەوە بوو كە ( شاخەوان عەبدوڵا)ی كاندیدی پارتی بەناوی ئاهەنگێگ گیڕانەوە كێشەیەكی گەورەی دروستكرد و دوای خۆی ڕایكردەوە بۆ هەولێر.
